Saron Veng, Aizawlah hripui vei Mi 500 chuang hmuh a ni tawh
Mizoramah village council leh local council zinga Covid-19 vei hmuh chhuah tawh tamna ber nia hriat Saron Veng, Aizawlah nimin zing thleng khan hripui vei mi 504 hmuh chhuah a ni tawh a; an zingah tualchhunga buaina vanga Myanmar aṭanga rawn chhuk mi eng emaw zat an tel.
Saron Veng Local Task Force hnen aṭanga thu dawn danin, Covid-19 léng thawh hnihna hnuah Saron Vengah hian April 24-ah Covid-19 positive hmuh chhuah ṭan a ni. April 24 aṭanga June 8 thlenga hripui vei hmuh chhuah tawh mi 504 zinga a tam zawk 263 chu enkawl mek niin, mi 238 chhuahtir an ni tawh a, mi pathum an thi tawh thung.
Saron Vengah hian chhungkua 799 an awm a, chhungkua 140 (17%) vel chu hripuiin a luhchilh tawh. Kum 2021 chhiarpuiah mi 3,578 an awm a, chuta ṭanga chhut chuan, hripui vei hmuh chhuah tawh hi 14.09% a tling.
Chutih rualin, YMA-in an veng mi leh sa an chhinchhiaha tel lo mi 100 vel Covid-19 positive an awm a, chu chu 19.84% vel a ni. Mi 100 vel zingah chuan Myanmar aṭanga raltlan pawh eng emaw zat an awm a, a zat chiah erawh sawi a harsa tih LTF Chairman chuan a sawi.
Hetih lai hian, Saron Vengah hian nimin khan RAT hmangin Covid-19 positive vei mi 10 hmuh chhuah leh a ni a, chu'ngte nen chuan an venga hripui vei hmuh tawh chu mi 514 an tling tawh tihna a ni.
Saron Veng LTF chairman Chuauhluna chuan Vanglaini zawhna chhangin, hripui vei an tam avang leh an venga hmun ṭhenkhat chu containment zone a nih avangin chhawmdawlna eng emaw zat an sem chhuak tawh tih a sawi a, "Chhawmdawlna kan pek hi sum kan hman tamna ber a ni a, pawisaa sem loin, ni tin mamawh ei leh in tur kan sem tlangpui," a ti.
Chuauhluna chuan, LTF-in ṭanpuina ṭhahnem tak an dawng tawh a, chu'ngte chu veng mipui hnenah an sem ṭhin tih a sawi.
Taitesena Group YMA, Saipum khua leh Lungleng khua aṭangin ṭanpuina thlai leh thei ṭhahnem tak an dawng tawh a, bialtu MLA Robert Romawia Royte-in cheng nuai 2 chuang hûin a pui tawh a, kohhran, pawl leh mimal ṭhahnem tak aṭangin ṭanpuina an dawng tawh bawk.