Mizoram tan uluk taka inenkawl chuan Sumah harsatna tur a awm lo - BJP

BJP, Mizoram Pradesh hruaitute chuan nimin khan an pisaah thuthar thehdarhtute an kâwm a; uluk leh ṭha taka inekawlna hnuaiah Mizoram tan sum leh pai bakah, ei leh bârah harsatna tur a awm loh thu an sawi.

Mizoram BJP president Vanlalhmuaka chuan, sorkar laipuiin health infrastructure leh sumah Mizoram harsatzia hriain ram dang aṭanga Covid-19 dona hmanrua a dawnte chu Mizoramin a dil vang ni loin IAF thlawhtheihna hmangin Lengpui Airport-ah an rawn dah zat zat thu a sawi a, "Sum leh paiah pawh hun pangngai chu ni se, kan hmuh mai loh turte thlengin kan state sorkar a rawn pe mek. Mizoram sorkar hian uluk taka management ṭha tak nena state a enkawl phawt chuan mipui mimir leh state tan sum leh paiah emaw, ei leh bar thuah harsatna tur a awm lo," a ti.

Vanlalhmuaka chuan, prime minister Narendra Modi hmalaknate chu mamawhtute tan - chi, sakhua, hnam leh party thliar loin tih a nih ṭhin thu a sawi a; chutianga hma la ve tur chuan Mizoram sorkar a phût.

Kum 18 chung lamte a thlâwnin Covid-19 vaccine pek a nih tur thu leh Pradhan Mantri Garib Kalayan Ann Yojna kaltlanga free ration mi pakhatah kg. 5 zela sem chu November 2021 thleng chhunzawm a nih tur thu Prime Minis­ter-in June 7, 2021 khan a puang tih sawiin Vanlalhmuaka chuan, "Hei hian kan PM hi dinhmun harsa zawkte lamṭang a nihzia leh hmûi chauh ni lo, a taka miretheite leh dinhmun harsa zawkte lamṭang a nihzia a tilang chiang hle," a ti.

Mizoram BJP President chuan, Covid-19 léng thawh hnihna do tura Mizoram inbuatsaihna chu an thláwp tih sawiin, "Mizoram mipuite Covid-19 laka an him theihna atana thawktu, sorkar lama thawktu te, LTF leh VTF te, mahnia inpea thawktute inpekna kan thlâwp a, kan ngaihlu hle a ni," a ti a; mahni nunna thàpa mi dangte tana inpe zawng zawngte Pathianin nasa takin malsawmnain vûr lêt se an duh thu a sawi bawk.