Minister-in Lengpui KVK hmalakna a tlawh

Agriculture minister C Lalrinsanga chuan nimin khan Lengpui KVK hmalaknaa Hmingdailova huana chherchhuan thum (three tier system) hmanga lo neih dan kalpui mek a tlawh.

Agriculture Minister chuan, ramngaw vah chereu nasat avanga tuihna kiam zel vên nan lo neih dan ṭha zawk, three tier farming system hmanga tlang ram lo neih a tam thei ang ber kalpui sorkarin a tum thu a sawi a, "Hei hi Focus ruahmanna nen pawh inhne rem chiah a ni," a ti.

Sustainable agriculture farming system kalpui a nih chuan loneitute thawh chhuah a tipung dawn nia sawiin C Lalrinsanga chuan, "Kut hnathawhah mi an tui thar phah dawn bakah, kan pipute hun aṭanga kan kalpui, kum tin lo vâta kan hâl ṭhin tlang ram lo neih hi three tier farming system hian eng emaw chen a tiziawm thei dawn a ni," a ti a; three tier farming system kalpuina turin External Aided Project aṭangin sum hmuh beisei a nih thu a sawi.

Three tier system-ah hian tlang ram lo neihah chherchhuan thum a awm a, chhuan hnuai ber terrace-ah buh leh thlaite chìn theihna tura ruahman a ni a, a láiah sum chang thlai (cash crop) kalpui theih tura ruahman niin, a chung berah kumhlun thlaite chìn theih tura ruahman a ni.

Agriculture Minister hian nimin vek khan Lengpui rama vaimím chíngtute'n fall armyworm (FAW) avanga harsatna an tawhte a hmunah a enfiah. Minister chuan, FAW inthlahpung zel tur hmeh mih a ngaih thu a sawi. FAW hi Mizoramah kum 2019 khan Lungleiah hmuh ṭan a ni. Minister hi Agriculture department hotute'n an ṭawiawm.