Hripui vei mi pakhat a thih belh

Covid-19 vei State Referral Hospital-a enkawl lai Ngunzaliani (37), Phunchawng chu chawhnu dar 3:20 khan a thi a; sorkar record angin, Mizorama hripui vei thi 58-na a ni.

Ngunzaliani hi Covid-19 positive a ni tih June 7, Thawhṭanni khan hmuh chhuah niin, hemi ni vêk hian SRH-ZMC-ah dah luh a ni a, hripui a vei tih hmuh chhuah a nih aṭanga ni hnihnaah a thi a ni. Amah hi rílpui cancer nei a nih thu, sorkar thuchhuakin a tarlang.

Phunchawng Branch YMA hruaitute hnen aṭanga thu dawn danin, Ngunzaliani hi Myanmar-a Tuithim khua a ni a, cancer vei a nih avangin inenkawl tura Aizawl rawn pan a ni. A ruang pawh an khua Tuithim lamah nizan khan hawpui nghal a ni.