Mipui thawh khawm CMRF aṭangin ṭanpuina Rs. 2,000 dawng tur Aizawlah chhungkua 3,063 thlang chhuak

Aizawl DC Dr Lalhriatzuali Ralte chuan nimin khan Aizawl khawpuia Chief Minister’s Relief Fund for Covid-19 kaltlanga chhungkaw harsate hnena chhawmdawlna sem dan tur inkaihhruaina a tichhuak. Ṭanpuina Rs. 2,000 dawng turin chhungkua 3,063 thlan a ni.

Bawrhsap tarlan danin LTF-te'n May 25, 2021 thlenga incident commander-te kaltlanga chhungkaw ṭanpui ngai list an thehluhte hnenah ṭanpuina Rs. 2,000 ṭheuh pek a ni dawn.

Aizawl veng hrang hranga LTF-te'n chhungkaw chhawmdawl ngai an thehluh zat chu 5,467 a ni a, chuta ṭang chuan ṭanpuina dawng turin chhungkaw 3,063 thlan a ni.

Ṭanpuina dawng tur chhungkaw dinhmun azirin sum fai aia bungrua (kind)-a pek remchang zawk leh ṭha zawk an awm chuan, a dawngtu turte remtihnain bungruaa inpek theih a ni a, an remtihna (consent) chu ziaka dahtir tur niin, APR thehluh rualin incident commander hnenah thehluh tel tur a ni.

LTF-te'n ṭanpuina mamawh list an thehluh tawhte aṭangin ṭanpuina dawng tur an thlang chhuak dawn a, ṭanpuina pek rualin APR-ah an hming ziahtir tur a ni. APR chu incident commander hnenah thehluh leh vek a ngai.

CMRF for Covid-19 sem chhuah tur hi incident commander (zone I-X)-te’n an bial LTF-te hnena sem chhuah turin nimin khan Aizawl DC Nazarat Branch aṭangin an la chhuak a, a dawngtu turte hnen a thlen vat theih nan chak taka hma la tura hriattir an ni. LTF-te pawh an venga dawng tur zat bituk anga ruahmanna siam tura ngen an ni.

CMRF for Covid-19 aṭang hian Aizawl Municipal Corporation huam chhunga chhungkaw 2764-te chu Rs. 2,000 ṭheuh pek an lo ni tawh.