Mau/rua chîn leh a ṭiak supply-ah Sum insiam tawnna a awm ring

ZPM Ṭhalai chuan, mau/rua chìn leh a ṭiak supply chungchangah thil fel lo, sum insiam tawnna a awm ngei an rin thu an sawi.

Nimina ZPM ṭhalaite thuchhuah chuan, "Raw-mi ṭiak supply tura thlante'n rate inang (Rs. 85) thlapa an chháng thei chu thil mak tak niin kan hria. Mau/rua chin leh supply chungchangah hian thil fel lo, sum insiam tawnna thil a awm ngeiin kan ring a ni," a ti a; Rawmi ṭiak man chu a sáng uchuak hlea an hriat thu a tarlang.

ZPM Ṭhalai chuan, 'Sunhlu kûngah thei dang a rah ngai lo' tih a nih angin, MNF party-ah MLA hmél tharte lang ṭhin mah se, thinlung lamah erawh chuan kum 12 kal taa Mizoram mipuiin an lo hnâwl tawh kalphung vuantute tho an lo ni ṭhin tih an sawi a, "Chief Minister berin mau/rua chîn dan tur a kalpui danah hian sawiselna tuar chak tak, insiamṭhat tumna nei si lo zia an la pu reng tih a chiang hle," an ti.

ZPM ṭhalaite tarlan danin, Horticulture de­part­ment-in Rawmi (Den­dro­calamus sikkimensis) ṭiak (seedlings) 40,000 supply-na tur tender a tihchhuah chhángtu pali an awm a, firm pathum thlan a ni. Firm thlan pathum zinga pakhat, Mizoram Bamboo Producer, Lengte chu an tlawh.

Mizoram Bamboo Producer hi rua/mau chi supply tender hmasaa D. Brandisii supply-tu, Growmore Biotech Ltd.-in Secondary Hardening Centre atana a hman tho a ni a, an nursery-ah D. Brandisii chi 80,000 vel leh Rawmi ṭiak 1,00,000 vel a awm a ni.

ZPM Ṭhalai chuan, "Hripui laka invênna vaccine la lo tam tak an awm lai leh vaccine duh khawp kan neih theih loh laia Rawmi ṭiak 15,000 lai leina atana SEDP sum hman a ni tur hi a hun lo hlein kan hria. Mau chungchanga sorkar hmalakna hi kan vil reng dawn a ni," an ti.