Covid-19 vaccine pekah kalphung ṭha zawk siam vat turin sorkar ngen

Mizoram Pradesh Congress Committee (MPCC) chuan, Mizorama Covid-19 vaccine pek dan a felfai lo nia sawiin, kalphung ṭha zawk siam vat turin sorkar an ngen.

MPCC chuan thuchhuah siamin, Mizorama January 16, 2021 aṭanga June 5 thlenga Covid-19 vaccine pek tawh zat chu first dose 2,66,613 leh second dose 52,191 a nih thu an tarlang a, "Thla ruk chhungin state population (2011 census) aṭanga chhûtin 4.75% chiah Covid vaccine (dose 1-na leh dose 2-na) kan pe hman tihna a ni," an ti.

Covid-19 vaccine pek danah kalphung fel tâwk lo a awm nual nia sawiin MPCC chuan, "Frontline worker ni lo, sorkarin vaccine la hmasa tura a tihte zinga mi ni bawk si lo, registration kalphung pangngai piah lama ngaih pawimawh chawp an tam hle," an ti a, chu chuan vaccine petu damdawi lam hnathawkte a tihbuai thu an sawi.

MPCC tarlan danin, vaccine pekna hmun ṭhenkhatah chuan ngaih pawimawh chawp an tam avangin ni khata vaccine pek tura ruahman zatin a daih lo ṭhin. Vaccine petu ṭhenkhatin an duhsak zawngte hnenah information pawimawh an pe ru fo bawk.

Congress party chuan, Mizoram mipui tam zawk chu vaccine la duh an ni tih sawiin, "Duhsak bik neia vaccine pekna hi kalpui zel a nih chuan mipui thîkthu a chhe hle dawn tih hre turin MNF sorkar kan chah. Vaccine inchuh buaina a thlen loh nan vaccine pek dana thil fel lo awmte hi siamṭha vat turin Mizoram sorkar kan ngen a ni," an ti.

MPCC chuan, kum 18-44 inkar vaccine la turte online-a an inziah luh dan leh vaccine lak hun tur book dan kalphung chu mi tam tak tan a buaithlak bakah thiam loh theih tak a ni tih an sawi a; kum 45 chung lamah online-a book kher loa kalpui theih a nih avangin, kum 18-44 inkarah pawh kalphung ṭha zawk duang thuai turin sorkar an ngen a ni.

April 26, 2021-a 'MNF sorkarin kum 18-44 inkarte hnenah a thlâwnin Covid-19 vaccine pe ve rawh se,’ tia Congress party-in thuchhuah an siam chu Health minister Dr R Lalthangliana'n chak takin a bawhzui nia sawiin MPCC chuan, "Kum 18-44 inkarte'n a thlâwna vaccine an la ve thei tur hi lawmawm kan ti tak zet a ni," an ti.