COVID-19 laka Mizoram a him nan Ṭawngṭai rual turin MKHC-in ngen
Mizoram Kohhran Hruaitute Committee (MKHC) chuan COVID-19 chungchangah nimin khan thuchah a tichhuak a; COVID-19 laka Mizoram a him theih nan March 14, Inrinni zanah emaw, March 15, Pathianni zanah emaw kohhran inkhawmah ṭawngṭai turin kohhran tin an ngen.
MKHC hruaitute nimina ṭhukhawm chuan Coronavirus chungchang sawiin, Mizoram mipui hnena ngenna an tichhuak nghal a; "Coronavirus laka Mizoram kan him zel theih nan leh he hripui laka chhiatna nasa zawk khawvela a thlen zui zel loh nan March 14 (Inrinni) emaw, March 15 Pathianni zan inkhawmah emaw Pathian ṭanpuina leh a thil tih theihna dila kohhran hrang hrangte'n a ruala ṭawngṭaina neih ṭheuh ni se," an ti.
Mipui tichî-âi thei leh belhchian dâwl lo social media-ah tuma'n thehdarh lo se an duh thu sawiin MKHC chuan, "Mipui kan him tlânna tura sorkar hmalakna leh ruahmanna hrang hrangte ngai pawimawha zâwm ṭheuh turin mi tin kan ngen a ni," an ti a; harsatna leh boruak ṭha lo a thlen chánga thil zuartute'n pamham taka an thil zawrh lai a man pangngai aia sanga an hralh ṭhin chu thil dik lo, Kristian tih atana mawi lo a nih thu tarlangin, chutianga ti lo tur chuan kohhran mite an ngen a ni.
MKHC chuan, hripui lêngin khawvela mi tam tak tithlabár mah se, ringtute tan chuan Pathian engkim ti thei avangin thlaphànna tur a awm lo tih an sawi a, "Bible-in 'Lalpa hming chu kulhpui a ni a, mi fel chu a tlân lut ṭhin a, a him ṭhin,' a tih angin, a hnena tlûk luh nan i hmang zawk ang u," an ti a ni.