Bawlhhlawh senghawi dan tur sawiho
Health minister Dr R Lalthangliana hoin nimin khan sorkar hotute'n Covid-19 veite enkawlna hmun dedicted covid hospital (DCH) State Referral Hospital (ZMC)-a bawlhhlawh ṭawih thei lo (plastic waste) senghawi dan tur an sawiho.
Ṭhutkhawmaah hian, Muallungthu rama ZMC plastic waste sâwngbâwlna tur hmun siam mek chu zawh thuai tawh tur ni mah se, tuna plastic waste inchhêk khâwl sate chu a rang thei ang bera senghawi a ngai tih sawi a ni.
Plastic waste senghawi dan tur ngaihtuah turin Aizawl mayor Lalrinenga Sailo kaihhruai task force din a ni a, member atan AMC executive councillor Laltlanzova Khiangte, SIPMIU Program Director, UDPA Director, AMC Commissioner, Hmuifang bialtu PWD Executive Engineer leh ZMC aiawh pakhat an ruat.
Hualngohmun rama bawlhhlawh sâwngbàwlna tur cheng nuai 3,500 man project siam mek a nih thu te, Aizawl tlak lam leh hmar lamah pawh hmun mamawh a nih thu tarlan a ni bawk.
Health Minister chuan, SRH-ZMC-ah bawlhhlawh ṭawih thei lo a pun chak thu sawiin, "ZMC-a Covid-19 veite enkawlna hmunah damlote leh anmahni awmpuitute bakah, thawktute leh volunteer tam tak an awm avangin loh theih lohin bawlhhlawh a pung chak a, bawlhhlawh hâlna khawlpui (incinerator) hmanga hâl theih chin chu a buaithlak loh a, hâl theih loh, a bikin plastic waste senghawia paihna tur ngaihtuah ran a ngai a ni," a ti.
Ṭhutkhawmah Medical Operational Team chairman Dr ZR Thiamsanga, chief secretary Lalnunmawia Chuaungo, Aizawl mayor Lalrinenga Sailo, Health, UDPA leh PWD hotu te, MPCB, SIPMIU, AMC leh ZMC hotute an tel a ni.