JUNE 10-AH COVID VEI MI 3 THI

Vawiin June 10 hian State Referral Hospital-a Covid-19 vei enkawl mek zinga mi 3 an thi a; sorkar chhinchhiah angin, Mizoramah hripui vangin mi 61 an thi tawh.

Zing dar 5-ah Malsawmdawngliani (25), Mualkhang (Nazareth Veng) a thi a, tlai dar 3 khan an khuaah vui a ni. Amah hi Covid-19 positive a ni tih June 5, 2021 khan hmuh chhuah a ni a, natna benvawn nei sa a ni.

Chawhnu dar 2:50-ah Remruatdiki (18) d/o Lalmuankima, Hlimen chu SRH-ZMC-ah a thi a, zaninah vui a ni ang. Natna dang a neih avangin damdawi-ina awm mek a ni a, Covid-19 positive a ni tih vawiin zing khan hmuh chhuah niin, SRH-ah dah luh nghal a ni.

Tlai dar 3-ah Mizoram police Hav. Lalramliana (52) h/o Lalnunpuii, Tuithiang chu SRH-ZMC-ah a thi leh bawk a, naktukah vui a ni ang. Covid-19 positive a ni tih May 20, 2021-ah hmuh chhuah niin, May 21-ah damdawi-inah dah luh a ni a; cancer vei mek a ni.