Thu dik lo thehdarhtu police-in an chhui zel
COVID-19 chungchanga thu dik lo thehdarhtua puh mi 11 man an nih hnuah, mi dang pawh man tur an la awma an hriat avangin police-te'n an la chhui zui zel.
Aizawl SP C Lalruaia chuan Vanglaini palai zawhna chhangin, an mi mante chu Mizoram khaw hrang hranga mi an nih thu a sawi a, "Sorkar hnathawkte pawh an tel. An thubuai hi bailable a nih avangin bail-in an chhuak vek rih. Police-te'n chargesheet an siam hunah an thubuai chu Court-in a ngaihtuah ang," a ti. Aizawl SP sawi danin, mi 11-te thubuai an siamsakna IPC Section 505(1)(b) chu kum thum thleng jail-a tàn emaw, jail tàn leh pawisa chawi emaw, pawisa chawi chauha hrem theih a ni. COVID-19 chungchanga thu dik lo thehdarh pakhat zawk pawh an chhui zawh tawh thu sawiin C Lalruaia chuan, "A thehdarh ṭantu pawh kan man tawh. Pakhat zawk kha chhui zui ngai a la awm a, chhui mek a ni," a ti.