KHAWTHLIR

Champhai District Special Court-a judge R Vanlalena chuan nimin khan heroin gram 138 kawltu Malsawmdawngkima (26), Champhai Electric Veng chu kum 8 chhung jail-a táng tur leh Rs. 50,000 chawi turin a hrem. Pawisa chawi tur a pek loh chuan thla 6 dang tàn belh turin a ti bawk. November 27, 2014 khan Malsawmdawngkima bag aṭangin Champhaia Excise & Narcotics staff-te'n heroin an man a ni.

OKD Institute of Social Change and Development, Guwahati leh T Romana College-a Department of Political Science-te chuan nimin khan Aijal Club-ah national level 'Capacity building workshop in social science research' an buatsaih. Ni thum awh tur workshop-in a tum ber chu Mizoram leh India hmarchhaka social science research hlâwk leh ṭangkai zawka kalpui dan tur zir a ni a; research scholar-te'n an research tana ṭangkai tur thilte an zir dawn a ni.

MHIP General Headquarters chuan, COVID-19 léng mek laka mipui an him tlân zawk theih nan MHIP sub-headquarters leh block conference hmun hrang hranga neih tura rua­hman tawh chu ṭhulh rih turin hriattirna a ti­chhuak a; conference neih hun turah MHIP hmunpui lam thu ngaichâng turin sub-hqrs leh block hruaitute an ngen. MNF party pawhin, March 2020 chhunga MNF block tinte block political training/confe­rence neih vek tur tih tawh chu COVID-19 vangin ṭhulh rih turin an hriattir.

Horticulture department leh Lawngtlai Florist Association (LFA)-te chuan nimin khan Lawngtlaia LADC conference hall-ah ni thum awh tur Horticulture Exhibition an buatsaih a, Horticulture joint director H Manthianga'n a hawng. Exhibition-ah hian pang­par, thei leh thlai chi hrang hrang pho chhuah a ni.

UDPA department leh Day-National Urban Livelihood Mission (NLUM) chuan nimin khan Lunglei Convention Centre-ah paper hmanga ip siam zirna an buatsaih. Lunglei Town Sanitation Task Force-in Lunglei khawpuiah paper aṭanga siam bag hman a rèl angin self help group-te tan paper bag siam training hi buatsaih a ni.