World Cancer Day hman a ni Mizoramah kum 3 chhungin cancer vanga thi mi 2,176 an awm
Nimin February 4 kha World Cancer Day a ni a, Assembly Annexe conference hall-ah Health minister Dr R Lalthangliana hoin hman a ni. Inkhawmah hian, Mizoramah tun hnai kum thum chhungin cancer vangin mi 2,176 an thih thu tarlan a ni a; ni tin cancer vangin mi 1.99 an thi ziah ang a ni.
Health Minister chuan, Japan International Cooperation Agency (JICA) sum hmangin Zemabawkah Cancer Speciality Hospital sak tum a nih thu a sawi a, "Rang takin bul kan ṭan thei dawn. He hospital sak tura ruahman hi hmarchhak state zinga cancer enkawlna hospital ṭha ber a nih a beiseiawm," a ti.
Damlo enkawl kawngah thiamna, hmanrua leh khawl ṭha a pawimawh thu sawiin Dr R Lalthangliana chuan, "Thawktute inpekna a pawimawh leh zual. Doctor leh nurse-te'n damlote an dâwr dan a pawimawh," a ti a; doctor leh nurse-te ṭawngkam leh thlamuanna awkáin damlo na tak tuarte nasa takin a chhâwk thei tih a sawi.
Inkhawma tarlan danin, kum tin khawvel pumah cancer vangin mi nuai 96 vel an thi a, chawhrualin, khawvel puma mitthi zinga hmun ruka ṭhena hmun khat chu cancer natna vanga thi an ni. Ram changkangte aiin ram changkang lo zawkah cancer vanga thihna a tam a, cancer vanga thi zinga 70% chu ram changkang lo zawktea thleng a ni.
Cancer thlentu thil chi hrang hrang a awm rualin, a thlentu tam ber chu vaihlo a ni a, cancer natna zawng zawng zinga 30% chu vaihlo zûk leh hmuam vang a ni. Mizoramah kum thum chhungin cancer vangin mi 2,176 an thi a, chawhrualin, kum khatah cancer vangin mi 725 thi ang a ni. Ni tin cancer vangin Mizoramah mi 1.99 (ni tin mi pahnih tling lo deuh) an thi ziah ang a ni bawk.
World Cancer Day hmanna inkhawm hi National Health Mission (NHM) mission director Dr Eric Zomawia'n a kaihruai a, National Programme for Prevention and Control of Cancer (NPCDCS) state nodal officer Dr Jeremy Pautu-in cancer enkawl dan a sawifiah. World Cancer Day thupui atan hian kum 2019 aṭanga 2021 thleng atan 'I am and I will' tih thlan a ni.