Competitive exam hun tur a la hriat loh
Covid-19 léng vanga inkhàrkhipin Mizoram Public Service Commission (MPSC) hnuaia exam-te result buatsaih a ti chak thei lo a, Combine Competitive Exam hun tur hriat theih a la ni lo.
MPSC secretary Lalhriatpuia chuan Vanglaini palai zawhna chhangin, Covid-19 vanga total lockdown puan chuan exam result siam kawngah hna a tihmuan rualin, result tihchhuah theih loh tur a awm loh thu a sawi.
Lalhriatpuia chuan, "MPSC hnuaia exam paper-te hi keimahni chhunga mi ni lo, páwn lama mithiamte'n an endik avangin kan inkalpawh zung zung thei lo a, anni pawh lockdown avanga office kal thei lo an ni hlawm a, in lamahte an endik ṭhin. Endiktute nen duh anga intlawhpawh zung zung theih a nih loh avangin exam result buatsaih chhung a rei deuh a ni," a ti.
MPSC Secretary chuan, The Mizoram Civil Services Combine Examination Rules 2020-ah Combined Competitive Exam hun chu kumin May leh June thla ruat ni mah se, inkhàrkhipin exam hun a tihkhaihlak thu a sawi.
Lalhriatpuia chuan, "May thla chu inkhàrkhipin kan zo a, June thla pawh thla chanve kan hmang ral leh lek lek tawh a, hri léng dinhmun hi sawi lâwk theih a nih loh avangin exam buatsaih hun tur hi sawi lâwk a harsa," a ti. MPSC hian group B (non-gazetted) an la neih pahnih chu exam an buatsaih tawh a, result tihchhuah a la ni lo.
Covid-19 léng avangin exam leh interview buatsaihah an fimkhur thu sawiin Lalhriatpuia chuan, "Interview hi kar hnih hun kan inpe a, a chhan chu Covid-19 contact an lo nih palha an inkhung hran chhung leh swab test result vel an nghah chhung tur nen ni 14 hun kan ruahman," a ti a; recruitment an buatsaihah Covid-19 kaihhnawiha hmanhmawh ngai zualte an ngaih pawimawh hmasak thu a sawi.
Lalhriatpuia chuan, Covid-19 inkài darh palh theih laka invèn nan interview kalpui dan an tihdanglam thu sawiin, "Covid-19 lên hma chuan Chairman room zím têah interview kan buatsaih ṭhin a, tunah erawh chuan sorkarah pawisa kan dil a, video conferencing hmangin interview kan neihpui," a ti.
MPSC hian interview turte tan main office thlang building-ah room hran an siam a, chutah chuan video camera, sound box, mike leh TV inchi 65 an chhawp a, chumi páwnah chuan supervisor-te'n an document-te an lo endik ṭhin. Interview board-a ṭhute'n MPSC Chairman room aṭangin interview an neihpui ṭhin a ni.