Ambulance khalhtute an thawk rim

Covid-19 léng thawh hnihna avangin hripui veite phurtu ber, Aizawla ambulance khalhtute chu an thawk rim hle a, thla hnih/thumte an inah haw loin, Civil Hospital, Aizawlah rawng inbàwlin an riak ṭhin.

Civil Hospital, Aizawl-a vehicle supervisor V Zoliana chuan Vanglaini zawhna chhángin, AMC area-a Covid-19 veite chu anmahni in aṭangin State Referral Hospital, CCC leh CCCC-ah an phur thleng ṭhin tih a sawi a, "Tunah hian department ambulance pali bakah, Aizawl DC ruahmanna angin bus pathum leh Bolero pahnih hmangin mi 5,000 chuang hripui vei kan phur kual tawh a ni," a ti.

Ambulance driver-te chuan, an hna chu khirh tak, fimkhur ngai si a nih avangin thla eng emaw zat chu an chhungte bulah an khawsa thei lo tih an sawi a, "Mahni fimkhur a ngai em em a ni," an ti a; chutiang chu an dinhmun ni mah se, hrehawm an tih loh thu an sawi.

V Zoliana chuan, Civil Hospital-a an riah khawma an ei tur chu damdawi-in thuneitute'n an tumsak a, an ei châk záwng chu anmahni pawhin an lei ve ṭhin thu a sawi a, "Driver-te hi positive awm dan azirin tlaivar a ngaih cháng a tam hle," a ti a; veng tina task force-te nen an thawhho ṭhat thu te, damlo na tak tak an phurh chángin lirthei dang leh mihring tan harsatna an thlen theih avangin lo hrethiam ṭhin tura mipui an duh thu a sawi bawk.