June 10-ah hripui vei mi 3 thi, Mizoramah hripui vangin mi 61 an thi tawh

State Referral Hos­pital-a Covid-19 vei enkawl mek zinga mi pathum chu nimin khan an thi. Sorkar chhinchhiah angin, Mizoramah hripui vangin mi 61 an thi tawh.

Nimin zing dar 5 khan Malsawmdawngliani (25), Mualkhang Nazareth Veng chu SRH-ZMC-ah a thi a, hripui vanga thi 59-na a ni a, nimin tlai dar 3 khan an khuaah vui a ni. Malsawmdawngliani hi Covid-19 positive a ni tih June 5, 2021 khan hmuh chhuah niin, damdawi-inah dah luh nghal a ni a; natna benvawn nei sa a nih thu sorkar thuchhuakin a tarlang.

Nimin chawhnu dar 2:50 khan Remruatdiki (18) d/o Lalmuankima, Hlimen pawh hripui vangin SRH-ZMC-ah a thi a, a chhungte dang pawh khung hran mek an nih avangin an duh dan angin nizan dar 8 khan vui a ni.

Remruatdiki hi Covid-19 positive a ni tih nimin zing khan hmuh chhuah a ni a, SRH-ZMC-ah dah luh nghal ni mah se, nimin vek khan a thi a ni. Amah hi natna khirh tak vei sa a nih avangin damdawi-in danga enkawl lai a nih thu, sorkar thuchhuakin a tarlang.

Nimin vêk khan tlai dar 3-ah Mizoram police Hav. Lalramliana (52) h/o Lalnunpuii, Tuithiang, Aizawl chu hripui vangin SRH-ZMC-ah a thi a, Mizorama hripui vanga thi 61-na a ni. Nizan khan a ruang ZMC-ah riah a ni a, vawiin chawhma dar 10-ah YMA Hall-ah vui a ni ang.

Lalramliana hi Covid-19 positive a ni tih May 20, 2021-ah hmuh chhuah niin, May 21 khan damdawi-inah dah luh a ni. Amah hi cancer vei sa a nih thu police hotute chuan an sawi.