Assembly special session neih a ṭul - Lalduhoma

ZPM leader Lalduhoma, MLA chuan, Covid-19 donaa sum harsatna chingfela ruahmanna fel tak siam turin Assembly special session neih a ṭul thu a sawi a; sorkarin ruahmanna a siamte chu duhthusam lo leh rilru tina deuhtu a nih pawhin, thuawih taka zâwm turin mipui a chah.

Lalduhoma hian nimin khan thuchah a tichhuak a; "Random test pawh nei zui ngam lo khawpa sorkar a harsa emaw kan tih laia restricted tender za chuang inpek reng site leh mipui mimir pawhin a hmutu tur an hriat sa reng tender chhuahte hian mipui rilru, a bik takin, frontline-a thawktute rilru a tihnual a, sawiho a ṭul. Ruahmanna fel tak siam turin special session neih a ṭul tak meuh a ni," a ti.

ZPM MLA chuan, hripui thawh thumna a thleng theia sawi a nih thu tarlangin, "Ruahmanna fel tak nena kan hmachhawn theih tawh nan budget hi ennawn a ṭul a, ngaih pawimawh hmasak tur kan thlan fel a ngai," a ti a; Chief Minister chu special session neih a nih theih nan hma la tura ngenin, session-a pharh si loa duh ang anga budget siksawi a, supplementary demand hmanga inhrût leh ṭhin thlakhlelhna chu kalsan a hun tawh thu a sawi.

Kum 2020-21 budget chu hripui lèn tirha siam a nih avangin inbuatsaih hman a ni lo tih sawiin Duhoma chuan, "Hripuiin min rawn nuai tâk avangin ennawn ni se tiin kan rawt a. Mahse, kan rawtna chu hnâwlin, kum tawpah Supplementary Demand hmangin kan inpalzút ta a ni. Hripuiin min nuai laiin kum 2021-22 budget siam a ni a, mahse, hripui dona lam a hawi hauh lo, duhsak ber tura ngaih Health department budget chu a hma aiin a tlem ta zawk a ni," a ti.

ZPM leader Lalduh­oma sawi danin, India rama Covid-19 a lèn ṭan aṭangin sorkar laipuiin hma a la nghal a, state-te chu ṭanpuina leh ngaihhnatthiamna chi hrang hrang a pe chhuak reng. January 2020-a hman turin Covid-19 Emergency Response and Health System Preparedness Package a duang nghal a, chu chu March 2024 thleng hman tur a ni.

Package chu state sorkarte'n an mamawh - thawktu lak belh leh training nan, ambulance lei nan, ICU din nan, ventilator, oxygen, test kit leh damdawi lei nan, laboratory leh damdawi-in tihchangtlun nante hman tur a ni tih sawiin Duhoma chuan, "Henga sensote hi central sorkar tum tur a ni. Package hi a ṭhat tehreng nen, vawiin thlengin laboratory pakhat chauh ka la ring a, hmanrua leh thawktute indaih lohna hi hripui kan do zawh lohna chhan ber pakhat a la ni ta a ni," a ti.

Lalduhoma chuan, Covid-19 dona atan MLA-te'n an fund aṭangin nikumah cheng nuai 25 ṭheuh an thawh bakah, nuai 15 ṭheuh pawh hêksak leh an ni tih sawiin, "Electric bill-te tisangin, sorkar hnathawk hlawhte pûr a ni a, contractor bill hrensak an ni a, tar, hmeithai leh rualbanlote pension chena hrènsak a ni," a ti a; hripui lakah ram a la him chuan loh thu a sawi.

Lalduhoma sawi dangte
1) Khawl leh hmanraw dang lei hi centra­lise a, inventory fel tak neih a ngai.
2) CHC leh PHC sakna tur restricted tender eng emaw zat pek a ni reng a, heng hi mumal taka House-a put luh a, sawiho a, langtlang taka kalpui a ṭul.
3) Tuna kan mamawh ber pakhat chu thawktu lak belh a ni. Mizoramah nurse post ruak 170 chuang awm mekin, ZMC bikah post ruak 85 zet a awm. Nikum January-ah nurse 50 la turin advertisement chhuah a ni a, tun thlengin lak a la ni lo, tunah nurse 26 lek lak tum mek a ni chauh.
4) NHM hnuaia nghet loa thawkte hi vawiin thlenga min tungdingtute an ni a, an dinhmun ngaihtuah a ngai hle.
5) Lockdown vanga eizawnna khaihlak tam takte chhawmdawlna tur special economic package siam vat a ngai.
6) Vegetable supply chain mumal tak duan a ngai.
7) A pangngaia office kal theih a nih loh avangin, office expense atana sum dahte tihtlem theih a ni ang.