KHAWTHLIR

Thisen pe
Kolasib District Arm Wrestling Association chuan nimin khan District Hospital Blood Bank-ah thisen unit 5 an pe. Thisen pek hi District Sports Committee ruahman anga kalpui a ni.

Containment zone Puan leh hlih
Lunglei district bawrhsap Kulothungan A chuan Lunglei Electric Veng huam chhunga Covid-19 hri inkài darh tamna hmun ṭhenkhat chu containment area-ah nimin khan a puang a, phalna nei lo tan luh leh chhuah phal a ni lo. Aizawla veng ṭhenkhata containment zone puan tawh zinga ṭhenkhat chu Aizawl DC Dr Lalhriatzuali'n nimin khan a hlip thung. Chu'ngte chu - Tanhril (Ramrikawn area), Tanhril Vengthar, Tuivamit, Bungkawn, Hunthar Veng, Armed Veng, Chhinga Veng leh Dawrpuia hmun ṭhenkhatte a ni a; heng veng pariat zinga hmun ṭhenkhat chu containment zone-a puan chhunzawm a awm.

Kawng khâr dawn
Traffic SP Rodingliana Chawngthu chuan, vawiin zing dar 4 aṭanga tlai dar 5 inkarah Bungkawn Vengthar kawngpuiah chawhmeh bazar hawn a ni dawn avangin, kawngpuia lirthei tlân phal a ni dawn lo tih a puang.

CM Relief Fund
Chief Minister's Relief Fund for Covid-19-ah nimin thleng khan Rs. 23,80,57,371 a lut tawh a, pek chhuah tura nimina remtih Rs. Rs. 23,39,500 nen Rs. 23,65,96,470 hman tawh niin, hman loh Rs. 14,60,901 a la awm.

SRH-ah mi 15-in ventilator hmang
State Referral Hospital-ah nimin tlai dar 5 thleng khan Covid-19 vei mi 212 enkawl mek an ni a, mi 25 chu ICU-ah enkawl niin, an zinga 15 chu ventilator hmantir mek an ni. SRH-ZMC Bulletin tarlan danin, SRH-ah hian nimin khan hripui vei mi 19 dah luh thar a ni a, mi 17 chhuahtir an nih laiin, mi pathum an thi. Enkawl mek mi 212 zinga 184 chu ward hrang hrangah enkawl an ni a, an zinga 79 chu oxygen pek mek an ni.