Post Devolution Revenue Deficit Grant-ah Central-in 25% Mizoram a pe tawh : 2021-22 chhunga vbc. 1,790 beiseiah vbc. 447.51 dawng tawh

Sorkar laipui chuan state-te hnena a pek ṭhin, Post Devolution Revenue Deficit Grant (PDRDG) hnuaiah June 9, 2021 khan Mizoram tan cheng vbc. 149.17 a pe chhuak. Sorkar kum kal mek, 2021-22 chhungin PDRDG aṭanga hmuh beisei aṭangin Mizoram sorkarin 25% a dawng tawh.

Mizoram sorkarin kum 2021-22 budget-a sum hmuhna tura a beisei hrang hrang zingah PDRDG aṭanga hmuh beisei chu a tam ber dawttu a ni a, cheng vbc. 1,790 hmuh beisei a ni. Sorkar laipui chuan PDRDG hnuaiah hian kum 2021-22 atan Mizoram sorkar hnenah cheng vbc. 298.34 a lo pe tawh a, June 9, 2021-a a pek chhuah leh vbc. 149.17 nen cheng vbc. 447.51 a pe chhuak tawh a ni.

April-June, 2021 chhunga PDRDG hnuaia sorkar laipuiin sum a pek chhuah hi Mizoram sorkarin kum 2021-22 chhunga hmuh a beisei cheng vbc. 1,790 aṭangin 25% a tling tawh.

Kum 2021-22 chhunga sorkar laipui aṭanga Mizoramin sum a hmuhna tura ruahmante chu - sorkar laipuia chhiah tlingkhawm state-a sem (Share of Central Taxes) aṭangin cheng vbc. 3,327.82, PDRDG aṭangin cheng vbc. 1,790, urban local body (ULB)-ah cheng vbc. 34, rural local body grant-ah vbc. 69 leh State Disaster Response Fund (SDRF) atan vbc. 47 a ni.

State chhung aṭanga sum hmuhna tura ruahmante chu - state sorkara chhiah tling khawm sorkar hnathawk leh cooperative society-te'n loan an rulhna Recovery of Loan & Advances aṭangin cheng vbc. 27.56, State Own Tax Revenue (SOTR) aṭangin cheng vbc. 719.56 leh chhiah ni lo aṭanga sorkarin sum a hmuh State Own Non Tax Revenue (SONTR) aṭangin vbc. 852.26 a ni.

SONTR-ah hian P&E department subsidy-a chhûn tur cheng vbc. 175 a huam tel a; Mizoram budget zinga Mizoram sorkarin a tum ve tura ruahman chu cheng vbc. 1,599.38 (14.35%) chiah a tling.

Mizoramin centrally sponsored scheme hrang hrang a kalpuina turah sorkar laipui aṭangin cheng vbc. 2,570.39 hmuh beisei a ni a; páwn lam aṭanga puihna (external aided project) aṭangin vbc. 136.82 leh NLCPR/ NESIDS/ NEC, Scheduled Tribe Welfare Grant leh Central Road Fund aṭangin vbc. 385.77 hmuh beisei a ni bawk. Sum pûk tura ruahman chhin chu vbc. 1,325.52 a ni.

Sorkar kum liam taah khan Mizoram sorkar hotute sawi danin, Covid-19 avangin sorkar laipui aṭanga sum hmuh tura beisei ang hmuh a ni lo hle a; chutih laiin, kumin sorkar kumah erawh chuan beisei ang hmuh a la ni rih nia thu dawn a ni.

Finance dept. hotute sawi danin, tun hnaia sum harsat zual chhan chu April-ah khan tun hma deuha loan lâk rulh ngei ngai a awm avangin cheng vbc. 150 pek chhuah a ni. Hei bakah hian project tàwp mai tur a awm a, chu chu an ui si avangin cheng vbc. 70 an pe chhuak a, hei hi chu kan la hmuh leh tho tur a ni.