ASF vangin vawk 5,639 thi tawh

Mizoramah vawk pûl hri African Swine Fever (ASF) lênna infected area 104 a awm tawh a, chu'ng hmunahte chuan ASF vangin nimin thleng khan vawk 5,639 a thi tawh.

Animal Husbandry & Veterinary (AH&Vety) department chhinchhiah danin, Mizorama district pakuaa khua/veng 104-ah ASF a léng tawh a, chu'ng hmunahte chuan vawk 40,838 vulh a ni a, vawk 5,639 chu ASF vangin an thi tawh a, vawk 35,199 a la dam.

ASF infectead area páwn lamah chhan hriat lohin khua/veng 55-ah nimin thleng khan vawk 262 a thi tawh bawk.

Aizawl district-ah ASF infected area a tam ber a, khua/veng 62 awmin, chu'ng zinga 54 chu Aizawl khawpui chhûnga mi a ni. Mizorama ASF hri kai vawk hmuh chhuah hmasak berna Lunglei district-a Lungsen khuaah March 21, 2021 khan hmuh ṭan a ni a, Lungsenah hian nimin thleng khan vawk 757 thi tawhin, Mizorama ASF vanga vawk thi tamna ber a ni.

ASF vei vawkte chu hri an kài aṭanga rei lo têah an thi ṭhin a, a vènna damdawi (vaccine) a awm lo. ASF hi vawkin vawk dangah awlsama takin a kài chhâwng thei a; mihring thawmhnaw, kawr, kekawr, pheikhawk, vawk enkawlna hmanraw chi hrang hrang leh ran chaw aṭangtein an inkài chhâwng thei bawk.