Hlawhtling ngei tur project a pawimawh - Dr R Lalthangliana

Industrial Development Board chu nimin khan Secretariat conference hall-ah an ṭhu a, chairman Dr R Lalthangliana, Commerce & Industries minister chuan, hlawhtling ngei tur ruahmanna neih a pawimawh thu a sawi.

Dr R Lalthangliana chuan, project leh proposal reng reng Board kaltlanga ngaihtuah tur­in lut zel se a duh thu sawiin, "Hlawhtling ngei ngei tur proposal leh project kan neih a pawimawh. A ṭul a nih chuan a hmunah ngei Board member-te leh mawhphurtu department-te'n enpui a ṭha a, kalphung thar kan siam a ngai dawn a ni," a ti.

Mizoramah industry lama hmasawnna a awm theih nan KVI Commission, Ministry of Textiles leh central body dangte hman ṭangkai a ṭul thu sawiin R Lalthangliana chuan, "Chutiang chuan Board-in hmalak kan tum dawn a ni," a ti a; SEDP hlawh­tlinna turin Industrial Development Board chu péng pawimawh leh thawh hlâwk thei tak nia a ngaih thu a sawi.

Ṭhutkhawmah hian, ṭhalai lehkha thiamte rilruah mahni kutkea entrepreneurship hmanga eizawnna kawng an ngaihtuah thei nan J Thankima College-a Industrial Demo Chamber siamna atana sum an mamawh angte pek an remti a; self help group-in Phainuama BRP Brick Factory-a leirawhchan siamna project an thehluh chu a hmunah Board member leh department aiawhte kalin en phawt ni se, an ti.

SEDP Apex Board-in hand­loom sector tihhmasawn nan pilot project atan cheng nuai 260 a ruahman chu beneficiary-te pek dan tur sawiho a ni a, handloom siamtu tur uluk taka thlan ni se an ti. He ruahmannaah hian puantah ṭhin mi 146 hnenah khawl leh bungrua pek a ni dawn. Baktawng Carpentry cluster atana state matching share thawh tur chu a rang lamah bawhzui ni se, an ti a; district 11 atana baseline survey chu ṭan vat ni se an ti bawk.