MLA-te'n ṭanpuina an sem chhuak

Mipui thlan tlin sorkar hotute chu an bialah ṭanpuina leh chhawmdawl hna thawkin an che chhuak zel a, nimin pawh khan MLA ṭhenkhat chuan an bialah ṭanpuina eng emaw zat an pe.

Minister of state Lalruatkima chuan nimin khan a bial Aizawl West-II huam chhunga LTF-te a tlawh kual a, Tuikual South, Tuikual North, Dinthar, Dawrpui Vengthar, Vaivakawn leh Kanan Veng LTF-te hnenah PPE 10 ṭheuh a pek bakah, Rs. 1,00,000 a sem.

Lalruatkima chuan, khawvelin hun thim tak a tâwk mek tih sawiin, "Khawvel kan buai mek a ni. Hun thim kan hmachhawn mek lai hian chhuanchham an awm ang tih sorkar chuan a hlau tak zet a, 'Sem sem dam dam, ei bil thi thi' tih hi kan thupui ber ni zel rawh se," a ti a; thingtlang mite'n ni 100 inhlawhna an hmu ṭha niin a sawi.

Thorang bialtu MLA Zodintluanga chuan nimin khan a bial chhunga PHC pahnih Lungsen leh Bunghmun tan Lunglei CMO hnenah RAT test kit 2,000 leh oxygen concentrator a hlan.

Zodintluanga chuan Lunglei district bikah swab sample test chungchangah harsatna tam tak a awm tih sawiin, "Tun dinhmunah chuan Health Minister hian a testing a kalpui danah hian Covid-19 a kui ṭiak mek a ni. Test tlema dam tur kan nih loh avangin test a tama in hmuhchhuah a tam hian a hri kengtu mihring kan nih miau avangin he hri hi kan hneh thei a ni," a ti.

Zodintluanga hian Lunglei DC hmu nghalin a bial Lungsen leh Bunghmun PHC atan ambulance ruahman a nih thu a lo hrilh.

Aizawl North-I bialtu MLA Vanlalhlana chuan nimin khan a bial chhunga Bawngkawn leh Leitan vengte a tlawh a, khawtlang mamawh leh harsatna awm theite a enpui. MLA hian Leitan CCCC buatsaihna atan Rs. 30,000 leh silpauline bandel khat a pe a, Bawngkawn LTF hnenah Rs. 50,000 a pe bawk.

Vanlalhlana chuan, hripui léng mekah Nagaland sorkar chuan an state mipui him nan non-development works sum zinga 20% chu Covid-19 dona leh a kaihhnawih atan a dah tih sawiin, "Hei hi cheng vbc. 48 vel a ni. Mizoram sorkar hi mipui thawhkhawmah a innghat lutuk a ni," a ti.

Serlui bialtu MLA Lalrinsanga Ralte chuan a bial chhung mi Covid-19 hripui vei, Jordan Centre, Seṭhawn CCC-a awmte hnenah nimin khan damdawi leh a kaihhnawih thil chi hrang hrang - vitamin-C, multi-vitamin, immunity booster, paracetamol, hmai tuamna, ORS, kut tihfaina leh tui ṭhahnem tak a pe.