Sample a tam thei ang ber endik a ṭul - Congress party

Congress party chuan, inkhuahkhirh leh inkharkhip kalpui ṭan aṭanga ni 50 hnuah pawh Covid-19 vei hmuh chhuah a tlakhniam theih loh avangin, Mizorama hripui do dan chu lockdown piah lamah hma thar lâk a ngai tawh nia an hriat thu leh swab sample a tam thei ang ber endik a ṭul thu an tarlang.

Mizoram Pradesh Congress Committee (MPCC) chuan thuchhuah siamin, "Sorkarin April 19, 2021 aṭangin lockdown a puang a, ni 50 hnuah pawh hri kái kan tlahniam thei lo. Lockdown puan aṭanga ni 53-na, June 10-ah phei chuan Mizorama hri kái tam ber ni a thleng a ni. Total lockdown ringawt hian min chhan lo tih a chiang tawh a, hripui kan do dan thlak a ngai tawh a ni," an ti.

MPCC chuan, hripui léng thawh hnihnaah hripui vei zingah damdawi-ina enkawl ngai, oxygen pek ngai leh ICU-a enkawl ngai an tam sâwt hle tih sawiin, "Hei hi a hun taka enkawlna an dawn loh ṭhin vang leh symptom a lan hnu chauha hriat chhuah an tam êm vangah kan ngai. Hripui veite'n a hun taka enkawlna an dawn theih nan a veite hmuh chhuah zung zung an ngai a ni," an ti a; chutiang tur chuan sample test rûnpui (mass detection drive) a rang thei ang bera kalpui a ngaih thu an sawi.

Mass detection drive chu tihmâkmawhah an ngai tih sawiin MPCC chuan, "Sorkarin sum tam tham tak a sên a ngai dawn tih kan hria. Mahse, rang taka hripui veite hmuh chhuah an nih dawn avang leh enkawlna an dawn hma tawh dawn avangin natna hmuh chhuah har vanga damdawi-in leh ICU-a enkawl ngai nasa takin a titlem dawn a, chu chuan sum tam tak a hum thung ang a, nunna tam tak chhan theih a ni bawk ang," an ti.

Congress party chuan, mi thiamte'n RAT chu 50% vel chauh rintlaka an ngaih a nih avangin rinpui bera neih loh an duh thu sawiin, "A tam thei ang ber RT-PCR hmanga test ni rawh se," an ti a; RAT positive-te chu RT-PCR hmanga ennawn zel ni se ṭha an tih thu an sawi bawk.