KHAWTHLIR

Thisen pe
Nimin khan KṬP, Siaha Branch chuan Siaha District Hospital tan thisen unit 16 an pe. Thisen pek hi kohhran hall-ah huaihawt a ni a, RAT tih hmasak niin, negative-te chauh thisen pektir an ni. Nimin vêk khan HBK MMA Gym, Kulikawn chuan Synod Hospital-ah thisen unit sarih an pe a, Adventist Youth Federation, Lunglei South pawhin Civil Hospital, Lungleiah thisen unit sarih an pe bawk.

IPS sîksawi
Mizoram sorkar chuan nimin khan notification tichhuakin, IPS pathum a sîksawi. Mamit SP Shashank Jaiswal chu Police Headquarters-ah OSD-in a awm dawn a, AIG (Modernisation) Vineet Kumar chu Mamit SP-ah awmin, 4th IR commandant Lallianmawia chu AIG (Modernisation)-ah a awm ang.

Tui bill pekna
PHE department, Aizawl WATSAN Circle chuan tui connection tihtawpsak mekte'n connection an tih leh theihna tur leh online-a bill pe thei ngang lote tana bill pekna tur an ruahman. Zemabawk, Chaltlang, Luangmual, Tuikhuahtlang, Dawrpui Vengthar leh Khatlaa tui bill peknaahte June 16-18, 2021 chawhma dar 9:30 aṭanga chawhnu dar 2 chhungin bill pek theih a nih thu a tarlang.

Jail tlawh
Kolasib District Jail hungna bang chu ruahsur vangin June 10, Ningani khan a chim a, nimin khan bialtu MLA K Lalrinliana'n a enfiah. K Lalrinliana chuan, District Jail-ah harsatna a thlen loh nan jail bang chim chu a ṭul ang anga thawmṭhat hna kalpui turin thawktute a chah a; rem ṭhat a nih hmaa a ṭul anga tihphui a nih theih nan hna bul ṭanna tur pawisa a pe a ni.

Tuition fee
School Education department chuan nimin khan hriattirna (notification) a tichhuak a; mimal, kohhran leh pawlin sikul an dinahte Covid-19 vanga class kal mumal theih loh chhungin tuition fee 70% aia sang lâk loh tur a nih thu a tarlang.