Kum 4 leh thla 10 chhungin Home-a thawk mi 666 thi

Home minister Lalchamliana chuan, kum 4 leh thla 10 chhung - March 2015 aṭanga December 2019 thlengin Mizoram sorkara Home department hnuaia thawk mi 666 an thih thu a tarlang.

Kumin February-March thlaa Assembly budget session neih zawh tâka INC member C Ngunlianchunga zawhna Home Minister-in ziaka a chhàn danin, March 2015 - December 2019 chhung khan Home department hnuaia thawk thi mi 666 zinga a tam ber chu police an ni a, police thi zat chu mi 625 an ni. Police bakah hian, Fire Service-a thawk mi 13, Mizoram Home Guards-a thawk mi panga, Prison hnuaia thawk mi 12, Sainik Welfare & Resettlement-a thawk mi pali leh Forensic Science Laboratory-a thawk mi pahnih an thi a ni.

Home Minister-in MLA zawhna a chhannaah hian Home department-a thite hming leh awmna bakah, an thih chhante tarlan vek a ni bawk.