Roreltute'n inkhârkhip zel ṭha an ti : A kalphung tur SEC kutah dah a ni

Health minister Dr R Lalthangliana hoa nimina Secretariat conference hall-a thuneitute ṭhukhawm chuan, total lockdown kalpui mek, June 14, Thawhṭanni zing dar 4-a tàwp tur chu chawlhkar khat dang pawhsei leha inkhárkhip chhunzawm an rél. Inkhârkhip kalphung tur chu State Disaster Management Authority (SDMA) hnuaia State Executive Committee (SEC) duan turin an dah.

Ṭhutkhawmah hian Home leh Disaster Management & Rehabilitation minister Lalchamliana, Covid-19 Medical Operational Team (MOT) chairman Dr ZR Thiamsanga, MLA, chief secretary Lalnunmawia Chuaungo, additional chief secretary JC Ramthanga, sorkar hotute, Mizoram Kohhran Hruaitute Committee, MOT, Joint NGO Coordination Committee leh local task force hruaitute an tel.

Sorkar hotute leh pawl aiawhte chuan an duh dante an sawi a; total lockdown a tàwp hunah inthlahdul nghal chu hripui léng dinhmun thlirin, a la hun loah an ngai. Covid-19 léng leh mipui dinhmun ngaihtuah chunga total lockdown kalpui chhunzawm zel dan turah ruahmanna siam turin SDMA SEC an ruat a ni.

Meeting-a tarlan danin, Mizoramah sorkar enkawl Covid care centre (CCC) 49 awmin, mi 2,479 awm theihna a ni a, Aizawl bikah CCC 15 awmin, mi 1,158 an awm thei.

Vantlang enkawl community covid care centre (CCCC) Mizoram pumah 168 awmin, mi 3,519 dah theihna a ni a, Aizawlah CCCC 109 awmin, mi 2,243 dah theihna a ni. Man cháwia awm theihna paid CCC chu Aizawlah chiah a awm a, pahnih awmin, mi 41 an awm thei a ni.

IDSP hotute tarlan danin, April thlaa Covid-19 positive hmuh chhuah mi 1,655 zinga 58% chu tualchhunga kái chhâwng an ni a, May leh June 10 thlenga positive hmuh chhuah, tualchhunga kái chhâwng chu 98% a tling.

Kum 18-44 inkar Covid-19 vaccine pek kalpui mek chu ngawrh lehzuala kalpui chhunzawm ṭha an ti a, "A tam thei ang berin vaccine an lâk thuai thuai a ṭul avangin sorkar laipuiin vaccine second dose la turte tana dahṭhat (reserve) tur a rawn tih pawh chu kum 18-44 inkarte tan pe chhuakin, second dose tur chu a lak hun taka an lak theih nan central nawr ni se," an ti.

Ṭhutkhawma tarlante
1) June 10, 2021 thlengin Covid-19 vaccine dose 3,34,790 pek a ni tawh a, mi 52,840 in dose an la kim tawh.
2) Kum 1 hnuai lam zingah hripui vei first wave (January 2020 - March 2021)-ah mi 20, second wave (April 2021 - June 10, 2021)-ah mi 88 an awm. Kum 1-10 inkar first wave-ah mi 172, second wave-ah mi 1,209 an awm bawk.
3) ZMC laboratory-ah swab sample 59,612 endik a ni tawh a, positive 2,918 (6.16%) hmuh chhuah a ni tawh.
4) Kuminah Covid-19 vanga thi mi 53 an awm a, May 2021 bikah mi 25 an thi.
5) Covid-19 vei thi zinga 50% chu kum 61 chung lam an ni a, natna benvawn nei 60% an ni.