Green Mizoram Day hman a ni

Nimin khan Mizoram hmun hrang hrangah Green Mizoram Day hman a ni a, thing ṭiak eng emaw zat phun a nih bakah, kum hmasa lama phun tawhte hmunhma tihfai a ni. Kumina Day thupui chu ‘Tuihna leh boruak ṭha siam nan thing i phun ang u’ tih a ni.

Green Mizoram Day hi Aizawlah chuan minister of state Lalruatkima hoin Mizoram College of Nursing (MCON), Falkawnah hman a ni a, MCON campus-ah thing phun a ni. Minister chuan, Covid-19 léngin Mizoram a luhchilh avangin Green Mizoram Day pualin programme lian buatsaih theih ni lo mah se, mahni awm hmunah ṭheuh a remchan angin thupui ‘Tuihna leh boruak ṭha siam nan thing i phun ang u’ tih chu tihlawhtling turin a ngen.

Mizoramin kuminah kum dang aiin ram kâng leh tuihna kang a tawrh nasat thu sawiin Lalruatkima chuan, "Hengte hian ramngaw tih­chereu pawizia, ramngaw humhalh ṭulzia leh thing phun uar pawimawhzia mipui thinlungah tuh se ka duh," a ti a; ramngaw chereu leh tuihna kang chat venhim kawngah ṭan la zual turin mipui a sáwm.

Green Mizoram Day hman­naah hian kumin ṭhál laia Mizorama kângmei véng ṭha ber district puan niin, lawmman hlan a ni a; pakhatna chu Mamit district niin, Serchhip district leh Siaha district-te chu pahnihna leh pathumna an ni.

Aizawl district bika kâng­mei vèn kawnga thawk ṭha ber chu Sumsuih khua niin, lawmman Rs. 50,000 hlan a ni a, pahnihna Tachhip hnenah Rs. 30,000 leh pathumna Mualkhang hnenah Rs. 20,000 hlan a ni bawk.

Nimin kha Green Mizoram Day a ni a, Mizoram hmun hrang hrangah hman niin, thing ṭiak eng emaw zat phun a ni. District chhunga kumin ṭhál laia kângmei vèn kawnga thawk ṭhate hnenah lawmman sem a ni bawk a, pakhatna hnenah Rs. 50,000, pahnihna hnenah Rs. 30,000 leh pathumna hnenah Rs. 20,000 hlan a ni.

Green Mizoram Day hi Lungleiah chuan HATIM campus-ah hman a ni a, Lunglei HPC vice chairman Lawmawma Tochhawng, MLA-in hmanpuiin, Mizoram state tree - Herhse ṭiak eng emaw zat an phun. He hunah hian kumin ṭhál laia kângmei veng khuate hnenah lawmman hlan a ni a; pakhatna Zobawk South, pahnihna Changpui leh pathumna Lungdai South-te an ni. Thing phun ṭha sorkar department leh pawlte hnenah lawmman sem a ni bawk.

Lunglei district-ah hian Green Mizoram Day hi Tlabung Forest Division pawhin Serhuan, Tlabungah SDO (Civil) Lalsanglura hoin an hmang a ni. Siahaah chuan Covid-19 léng avangin Green Mizoram Day pualin hun hman a ni lo a, District Level Committee on Green Mizoram (DLCGMD)-in thing chi hrang 12 ṭiak 1,062 an sem thung.

Siaha DC conference hall-ah kângmei vèn kawnga hma la ṭhate hnenah lawmman sem a ni a; pakhatna Amobyu B, pahnihna New Laty leh pathumna Khopai an ni. Kângmei vèn chungchanga mipui zirtirna thu ziak ṭha chanchinbu pathum hnenah lawmman sem a ni a; pakhatna The Time of Maraland hnenah Rs. 3,000, pahnihna Maraland hnenah Rs. 2,000 leh pathumna Moonlight hnenah Rs. 1,000 hlan a ni.

Champhaiah chuan bawrhsap Maria CT Zuali hoin Horticulture Office complex, New Champhaiah hun hman a ni a, thing ṭiak chi 13 - Boottle brush, Làmkhuang, Tlaizawng, Thuza, Herhse, Cháwmzil, Khuangthlí, April par sen, Sasua, Ngiau, Char, Ngaingaw leh Zawngṭah ṭiak 2,404 sema phun nghal a ni.

Kangmei veng ṭha khua leh chanchinbute hnenah lawmman sem a ni a; kângmei veng ṭha khuate chu - pakhatna Lungphunlian, pahnihna Tualcheng leh pathumna Vaphai a ni. Chanchinbu hma la ṭhate chu - pakhatna Pasalṭha, pahnihna Lenrual leh pathumna Rihlipui te an ni.

Kolasib-ah chuan Regional Sports Training Center, Saidanah Green Mizoram Day pualin thing phun hnatlang neih a ni a, bialtu MLA K Lalrinliana, minister of state-in a hmanpui. District-a kângmei veng ṭha ber chu Thingthelh an ni a, Khàmráng leh North Chhimluang chu pahnihna leh pathumna an ni. DFO N Viji tarlan danin, kum 2020 chhungin Kolasib district-ah thing phun tur 369 pek chhuah a ni a, kumin chhungin thing 21,290 phun tuma hmalak a ni bawk.

Mamit-ah chuan DLCGMD buatsaihin Aizawl-Mamit-Kawrthah kawngpui pengṭhuama H Thanzauva Chawlhbukah Green Mizoram Day hawnna hun hman a ni a, bialtu MLA H Lalzirliana'n a hmanpui. Mamit district-a kângmei véng ṭha ber Nghalchawm a ni a, Kawrthah South leh Kanhmun-te chu pahnihna leh pathumna an ni. Mamit DFO chuan nimin khan thing phun tur 250 vel a sem chhuak.

Green Mizoram Day hi Khawzawlah chuan sorkar department hrang hrang, VC leh tlawmngai pawlte nen Khawzawl Darngawna Mualvum Park-ah hman niin, thing phun hnatlang nei a ni a, thing ṭiak 2,219 sem chhuah a ni.

Khawzawl district-a kumin ṭhál laia kângmei véng ṭha ber chu Vankal khua a ni a, Hmuncheng khua leh Khawzawl Darngawn ten an dawt. Hnahthial district-ah chuan Green Mizoram Day hi Rallang tlanga helipad-ah hman a ni a, sorkar pisa hrang hrang, VC leh tlawmngai pawlte telin, district bawrhsap H Dolianbuaia'n a hmanpui.

Hnahthial district-a kângmei véng ṭha ber chu Pangzawl South a ni a, pahnihna Hnahthial South-I leh pathumna Rotlang East an ni. Thing ṭiak 970 sem chhuah a ni bawk.