Lungleia RT-PCR bun duhtute'n High Court-ah PIL an thehlut

Lungleia RT-PCR hman duhtu intél khawm, RT-PCR for Chhimbial chuan, Civil Hospital, Lungleiah RT-PCR khawl bun a nih a, hman a nih theihna atan hma la tura ngenna nimin khan Gauhati High Court-ah public interest litigation (PIL) an thehlut. PIL hi June 14, kar leh Thawhṭanniah ngaihtuah a ni dawn.

RT-PCR for Chhimbial chuan, PIL an theh­luhah hian kum 2020-ah sorkar thuneitute'n Mizoram chhim lam district pali tana awlsam zawkna tur leh hripui dona atana hman ṭangkai turin Lungleiah RT-PCR dah an tum tih an hmuh thu an tarlang a, "Chumi bawhzui chuan Expert Team an rawn tír a ni. Anni hian Civil Hospital, Lunglei thuneitute kaihhruaina hnuaiah hospital fang kualin, ICMR guidelines zawng zawngte nen an enkawp vek hnuah RTPCR lab. a din theih a ni tiin sorkarah pawh recommendation an thehlut a ni," an ti.

Health & Medical Education Director pawhin Civil Hospital, Lunglei Medical Superintendent hnenah May 7, 2021 khan lehkha thawnin, RT-PCR bun (install) tura hriattirna a tihchhuah thu tarlangin RTPCR for Chhimbial chuan, "Mahse, vawiin thlengin RT-PCR hi Covid-19 hri kai leh kai loh endik nan hman a la ni lo. Test result backlog a tam ṭhin vangin test result nghaka zan tam hrehawm taka awm kan unaute tam tak an awm ṭhin," an ti a; Mizoram sorkar chuan an dikna chanvo 'Right to Life' a palzûtsaka an ngaih thu an tarlang.

RT-PCR for Chhimbial chuan, North Eastern Council kaltlanga laboratory block sakna tur sum dil a tum nia an hriat thu tarlangin, "Tun dinhmunah chuan lo nghah veng veng chi-ah kan ngai lo," an ti.

Lungleiah RT-PCR khawl bun a nih theihna tura sorkar hmalakna ṭanpui nan RT-PCR for Chhimbial hian May 29, 2021 khan thawhlawm an khawn ṭan a, sum ṭhahnem tak an dawng tawh a ni.