Hmun hrang hrangah thing phun a ni

Nimin khan Green Mizoram Day a nih angin, Mizorama zirna-in, pawl leh sorkar hnuaia awm mi ṭhenkhatte'n thing an phun a, kum hmasa lama thing phun tawh hmunhmate an tifai bawk.

Mizoram hmun hrang hranga NSS volunteer-te chuan nimin khan Green Mizoram Day pualin thing ṭiak 1,290 an phun. NSS volunteer, nimina thing phuntute hi thingtlanga zirna-ina NSS-te an ni hlawm a, Aizawl leh district khawpuia zirna-ina NSS-te chuan hun remchang dangah an phun ve leh dawn a ni.

Mizoram Pollution Control Board (MPCB) pawhin an pisa chhehvelah thing eng emaw zat an phun a, Aizawla sikul leh college-a Eco Club-te leh tlawmngai pawlte hnenah thing ṭiak 600 chuang an sem bawk.

Govt. Aizawl College-a Eco Club leh NSS unit-te chuan Mualpuia an college hmun tharah thing phun hnatlang an nei a, Sports & Youth Services minister Robert Romawia Royte-in a hmanpui. Thing ṭiak 50 vel an phun a ni.

Robert Romawia Royte chuan, thing leh nungcha dangte chu mihring nena inzawm tlat a nih thu sawiin, "Kum rei vak lo kal taa ṭhál lai pawha kang chat ngai lo tuihna ṭha tak tak awm ṭhinte chu ngaw kan ṭhiah nasat avangin a tlem tial tial a, thing leh mau kan neih mek humhalh leh a thar phun belh zel hi kan dam khawchhuahna tur a ni," a ti.

T Romana College chuan Green Mizoram Day pualin an college campus-ah thing phun hnatlang an nei a, an thing phunte chu a phuntu ngeiin a puitlin thlenga vil turin thu an tiam bawk.

Zoram Thar pawhin Thenzawla Zofate Pathian Biakinpui hmun an buatsaih mekah Khuangthli, April, Vaube, Cháwmzil leh Thlado ṭiak 120 an phun a ni.

Environment Lovers (EnLo) pawhin North Vanlaiphai leh Ṭamdil aṭanga thing ṭiak chi hrang hrang an lakkhawmte chu khaw hrang hranga semkualin, hengte hi nimin khan phun a ni.