Congress sorkar hmalaknate hripui léngah hmanrua atan Pathianin a hmang lâwk - MPCC

Mizoram Pradesh Congress Committee (MPCC) chuan thuchhuah siamin, Congress party-in sorkarna an chelh laiin tih dik loh eng emaw zat an neih karah, an hmalaknate chu tuna hripui léngah Mizoram a buai lutuk lohna atana Pathian hmanrua nia an hriat thu an tarlang.

MPCC chuan, Congress party-in sorkarna an chelh chhungin Pathian hruaina leh mipui thlawpna an hmu ṭha hle tih sawiin, "Pathian leh mipui duhsakna avanga hun eng emaw chen sorkarna kan chelh chhungin tih dik loh leh tih fel tâwk loh eng emaw zat kan nei tih kan hria a, Pathian leh Zoram mipui hnenah thuphá kan chawiin ngaihdam kan dil a ni," an ti.

Congress party chuan, "Congress sorkarin infrastructure ṭha tak tak a lo siamte hman ṭangkai theih a ni hi hriat lâwk loh he hripui léng kara Mizoram kan buai lutuk loh nan Pathianin Congress sorkar kal ta kha hmanrua atan a lo hmang lâwk ni ngeiin kan ngai," an ti a; Congress sorkar laia hmalaknate chu Covid-19 hripui lêng karah ṭangkai taka hman a nih thu an sawi.

Ṭangkai taka hman mek Bairabi thleng rél kawng siam te, Lengpui Airport siam te, medical college (MIMER/ZMC) dinte chu Congress sorkarin a siam leh dinte a nih thu an tarlang a ni.

Hripui vanga inkhàrkhip loh theih loh a nih karah hma lam hun thlir chunga sorkarin ngaihtuahna a sên thiam a ṭul hlea an hriat thu sawiin MPCC chuan, "Hripui laka kan him theihna tura ruahmanna a kal mek lai hian, kan hma lam hun thleng turah ei leh bara harsatna nasa tak kan tawh lohna turin tun aṭangin sorkarin ruahmanna fel tak siam se kan duh a ni,"

an ti.

Congress party chuan, hripui laka himna tura sorkar leh khawtlang hruaitute'n inkaihhruaina an siamte chu ṭha taka zâwm tur leh fimkhur taka nung turin mipui an ngen bawk.