ZPM-in pumpelh theih sum kalnate 20% tala tihniam turin sorkar ngen

ZPM party chuan, lungrual taka hripui do a nih theih nan leh hripui donaah sum tam zawk dah a nih theih nan Mizoram sorkar chu special assembly session ko turin an ngen a; pumpelh theih sum kalnate 20% tala tihniam turin an ngen bawk.

ZPM chuan, June 10, 2021 khan sorkar laipuia Ministry of Finance hnuaia Expenditure department chuan ministry/department zawng zawngte sum hmanna tura ruahman, pumpelh rih theihte chu sum ruahman aṭangin 20% tala titlem turin office memorandum a siam a, object head leh code 19-ah suggestive list siamin, Covid kaihhnawih sum hmanna erawh a tel lo tih an tarlang.

Mizoram sorkarin sum a neih zinga 90% dáwn chu sorkar laipui aṭanga lo kal a nih thu sawiin ZPM chuan, "Tunah hian hripui léng karah sum kan harsa hle. Kumin 2021-21 chhunga sum hman tur ruahman zat chu vbc. 11,330 a ni. Finance Ministry-in sum hmanna tur siam rem theih a tih aṭanga kan budget thlir chuan, vbc. 2,841 vel chu a hmanna tur tihhniam theih niin a lang a, chuta ṭanga 20% chu vbc. 57 a tling pha a ni," an ti.

Budget session-ah Finance Minister-in sum hmuh tur beisei aia tlem hmuh a nih thu a sawi laiin, hmuh tura beisei loh tam tak hmuh a ni thung tih sawiin ZPM chuan, "Inrenchemna a awm loh avangin Supplementary Demand hmangin vbc. 3,058 zet dil belh a nih phah a, leiba cheng vbc. 1,000 chuangin a pun phah a ni," an ti a; chutih laiin, Health department tana dil/hman belh erawh chu vbc. 100 chuang awrh a nih thu an sawi.

ZPM party chuan, hripui léng dona atana sum dah chu hripui lèn hma aiin a tlem zawk tih sawiin, "Kan sorkar hian sum hmanna tura ruahmanna hi ennawn lehin, hri dona atan sum tam zawk dah turin kan beisei a. ZPM Leader Pu Lalduhoma, MLA-in special assembly session ko tura a ngen angin, lungrual taka hri donaa ke pên turin kan ngen tak zet a ni," an ti.