CM leh MZP-te'n Zampui tlangdunga Police outpost dah chungchang an sawi
MZP hruaitute chuan nimin khan chief minister Zoramthanga a pisaah an hmu a; Tripura sorkar hmalaknain Zampui tlangdunga Mizo awmte dîpdâl tur zawngin Bru ráltlante dah tum a ni chu ṭha lo an tih thu leh Zampui tlangdungah police outpost dah a ṭul thu an thlen. Chief Minister chuan, Zampui tlangdungah police outpost dah a nih tur thu a lo hrilh.
Tripura sorkarin Zampui tlangdunga Mizote dîpdâl tur záwngin Bru ráltlante dah a tum mek nia sawiin MZP hruaitute chuan, "Kan unaute himna tur leh thlamuan tur hian rang taka Zampui tlangdungah police outpost dah a ṭul thu leh Chawngte khuaa IR battalion dah a pawimawhna kan sawipui a ni," an ti.
Hemi chungchangah hian Chief Minister chuan, Zampui tlangdunga Mizote thlamuan turin police dah a nih tur thu a sawi a; Chawngte khuaa IR police dah chu Mizote tana thil pawimawh tak, hnam dang huangtau lutuk tur venna atan thil ṭul a nih thu sawiin, Home Minister nen an sawi dun nghal tur thu MZP hruaitute a hrilh.
MZP hruaitute chuan, Manipur-a Zo hnahthlak awmte nen tun aia ṭha leh zuala intlawhpawh zung zung theih nan helicopter service tir turin an ngen a; Chief Minister chuan, sorkarin a ngai pawimawh a, a hmun tur leh ṭul ang pawh lo bawhzui a, helicopter service a nih theihna turin hmalak a tum tih a hrilh niin MZP chuan an tarlang.
Bairabi Zophaia Mosolman biak-in sak chhunzawm tura bungrua leh ṭul ang lâk khawm mek titàwp tura MZP-in an ngen chungchangah CM Zoramthanga chuan, rang taka tihtawp a nih theih nan hmalak nghal a nih tur thu a lo hrilh a ni.