Páwl leh kohhrante an che chhuak

Mizoram Rural Bank (MRB)-a thawktu pawl pahnih - MRB Officers’ Association (MRBOA) leh MRB Staff Association (MRBSA)-te chuan nimin khan MRB branch awmna khua/veng 89-ah Covid-19 donaa a ṭul apianga hman turin local/village task force leh CCC-ahte ṭanpuina Rs. 10,00,000 an hlân a; Silchar Branch YMA hnenah Rs. 40,000 an pe bawk.

MRB hotute chuan, hun harsaah phût lêt nei loa rim taka thawktu LTF/VTF leh medical team-te zahna chibai an bûk tih sawiin, "Hri laka an him theih nan Pathianin vengin hruai zel rawh se," an ti a; Mizoram sorkarin MRB Head Office building thar, Covid-19 veite enkawlna atana hmang tura thutlukna a siam chu ṭha an tih thu an tarlang.

Mission Veng Kohhran chuan Aizawla hripui vei mek tamna ber veng, Saron Veng mipui chhawmdawlna atan Rs. 1,00,000 an pe a; Mission Veng bialtu pastor Rev. Vanlalmuanpuia Khiangte leh kohhran secretary Upa C Lalmuankima ten nimin khan Saron Veng LTF chairman Chuauhluna hnenah an hlan a ni.

Sesawng khawtlang chuan nimin khan Republic Veng khawtlang tan chawhmeh chi hrang hrang Pik-Up phur hnih an hlân a; lawmthu sawi nan Republic Veng LTF chuan Rs. 5,000 an lo hlan ve thung. Republic Veng LTF hnenah hian nimin vek khan T Romana College NSS unit chuan Covid-19 do nan CCCC-a hman turin medical kit ṭhahnem tak an pe bawk.

Thingthelh khawtlang pawhin Ningani khan Zarkawt Veng, Aizawlte hnenah thlai leh thil rep chi hrang hrang an pe.

Khawzawl Officers' Club (KOC) chuan nimin khan an president R Lalrintluanga hoin Khawzawl Zuchhip VC-inah luan chhuah hun an buatsaih a; Covid-19 léng vanga khawsak harsate ṭanpui nan Khawzawl veng hrang hranga VTF 10 hnenah Rs. 1,00,000 an sem.

KOC hian CCC-a awmte mamawh lei nan Rs. 5,000, Khawzawl District Hospital-a hripui donaa mamawh lei nan Rs. 15,000 leh Khawzawl district chhunga HSLC 2021-a ti ṭha zual mi pali hnenah Rs. 13,000 an sem bawk.