Lirthei neitu hming thlak dilna 1,478 a lut
Mihring (passenger) phur chi lirthei neitute'n an lirthei, an hminga awm lote an hminga thlak (transfer of ownership) tura dilna lâk chhuah theih hun a tawp tawh a, State Transport Authority (STA)-ah mi 1,478-te hming thlak dilna ziah luh a ni tawh.
STA chuan July 9, 2019 khan notification tichhuakin, mihring phur chi lirthei neitute chu thla ruk chhungin an lirthei, an hminga awm lote an hminga thlak turin a hriattir a; hming thlak theih hun chu December 2019-ah tàwp tawh mah se, hming thlak lo an la awm avangin January 2020 chhung hun pawhsei leh a ni.
STA-in hming thlak dil theih hun a siam chhungin mi 1,478-te'n hming thlak an dilna ziah luh a ni a; chutih laiin, lirthei endik leh file kal mekte a la awm avangin hming thlak dilna tihfel loh eng emaw zat a la awm thu STA hotute chuan an sawi a, hming thlak dilna form erawh chu January 2020 thleng bak an pek chhuah tawh loh thu an sawi.
STA notification-a tarlan danin, hun tiam chhunga hming thlak hman lote chu an permit tihtawpsak thlenga hmalak theih a ni a, lirthei permit tihtawpsak erawh an la awm lo. Tunah chuan STA-in hriattirna a chhuah angin legal heirship certificate neite chauh hming thlak theih a ni tawh.