Lungrem chimin in a hnâwlah mi 4 thi, a chim chhan chhui a ni ang: DMR Minister

June 11, Zirtawpni zan dar 9:30 vel khan Ṭhuampui Veng, Aizawlah lungrem chimin in pakhat a hnâwl a, mi pali an thi. He thil thleng chungchang hi chhui chiang turin Disaster Management & Rehabilitation (DMR) minister Lalchamliana chuan Aizawl DC a hriattir.

Ṭhuampui Branch YMA secretary Lalchangliana hnen aṭanga thu dawn danin, lungrem chimin in a hnâwl tak chu Lallianvela in, chhâwng hnih a ni a, mi dangin an luah. In chung zawk luahtu Lalbiak­zuala tu leh fate pali an thi a, a hnuai zawk luahtute an him thung.

Chhiatna thlengah hian khaw­­tlang mipui, State Disaster Res­pond Force leh Central YMA hnuaia Disaster Managment Sub-Committee member-te'n chhan­chhuah hna an thawk. In chim zanah Lalthlamuani (16), Joseph Lalrinhlua (5) leh Lalngaihsaka (3) te ruang lak chhuak a ni a, a tuk Inrinni zing dar 5 velah Lalṭanpuii (16) ruang lak chhuah leh a ni bawk. Mitthite chu Inrinni khan vui an ni.

Covid-19 léng mek avanga khawtlang huap hnatlang koh a rem loh avangin vawiin hian Ṭhuampui Local Council, YMA Branch Committee member-te leh mistiri association member-te chu chhiatna thlenna hmunhma tifaiin an hnatlang dawn.

Chhiatna thlenna hmun hi Inrinni khan bialtu MLA Zoram­thanga, chief minister leh DMR minister Lalchamliana ten an tlawh a, khawtlang hruaitute kaltlangin ṭanpuina an hlân a ni.

DMR Minister chuan, khuarêl chhiatna ni lo, fimkhur tâwk loh leh inthlahdah vanga chhiatna a thleng ṭhin chu thil pawi a nih thu sawiin, chhiatna thlen dan chu chhui chiang turin amah ṭawiawmtu Aizawl DC Dr Lalhriatzuali Ralte a hriattir a, "SDRF scheme aṭangin chhiat tâwkte ṭanpuina sorkarin dan a neih mek angin hmalak a ni ang," a ti.