Covid-19 vangin mi 64 thi tawh

Nimin khan Covid-19 vei State Referral Hospital-a enkawl lai mi pahnih an thi a, sorkar chhinchhiah angin hripui vangin Mizoramah mi 64 an thi tawh.

Ruallawma (86) h/o Lalthanzami Sailo (L), Saron Veng, Aizawl chu nimin chhun dar 12:25 khan SRH-ZMC-ah a thi a, nimin tlai dar 3:30 khan Saron Veng Presbyterian biak-in kawta Jubilee Hall-ah vui a ni.

Ruallawma hi Covid-19 positive a ni tih June 5, 2021-ah hmuh chhuah niin, SRH-ZMC-ah dah luh nghal a ni a, natna benvawn dang vei sa a nih thu sorkar thuchhuakin a tarlang.

Lalchhuanawmi (42) c/o L Piandenga (L), Electric Veng, Aizawl pawh nimin tlai dar 5:50-ah hripui vangin SRH-ah a thi a, vawiin chawhma dar 11-ah Electric Veng YMA Hall-ah vui a ni ang.

Lalchhuanawmi hi Covid-19 vei a ni tih May 24, 2021-ah hmuh chhuah a ni a, May 31 khan SRH-ZMC-ah enkawl ṭan a ni. Natna benvawn nei sa a nih thu sorkar thuchhuakin a tarlang.

Covid-19 vei State Referral Hospital-a enkawl lai C Vanlawma (75) h/o Hrangzikpuii (L), Chaltlang Lily Veng pawh June 11, 2021 zan dar 8:15 khan a thi a, Inrinni chhun dar 11:30 khan vui a ni. Covid19 positive a ni tih June 1, 2021-ah hmuh chhuah niin, SRH-ZMC-ah dah luh nghal a ni a; natna benvawn dang nei sa a ni.