June 2021-ah Covid-19 vei Mi 2,879 hmu chhuak tawh

Mizoramah June 11, 2021 khan Covid-19 vei mi 178 hmuh chhuah a ni a, June 12, Inrinni khan mi 345 hmuh chhuah a ni bawk a; June thlaah mi 2,879 hmuh chhuah an ni tawh. Inrinni leh nimin khan hripui laka fihlim tawh mi 303 chhuahtir an ni a, hripui vangin nimin khan mi pahnih an thi.

Covid-19 vei June 11-a hmuh chhuahte chu ZMC laboratory-a hmuh mi 26, TrueNAT-PCR hmanga hmuh mi pali leh RAT hmanga hmuh mi 148 an ni a; June 12-a hmuh chhuahte chu ZMC-a hmuh 44, TrueNAT hmanga hmuh 15 leh RAT hmanga hmuh 286 an ni.

June thla ni 12 chhung­in Mizoramah hripui vei mi 2,879 hmuh chhuah a ni tawh a, chawhrualin ni tin mi 239 chuang hret hmuh chhuah an awm ziah ang a ni.

Mizoramah Covid-19 vei mi 15,266 hmuh chhuah a ni tawh a, mipa 8,885 leh hmeichhia 6,381 an ni. Nimin tlai dar 5:00 thleng khan mi 11,661 (76.39%) chhuahtir an ni tawh a, mi 64 (0.42%) thi tawhin, enkawl mek mi 3,541 (23.19%) an awm.

June 11, Zirtawpnia swab sample endik dan chu - ZMC laboratory-ah 1,013, TrueNAT hmangin district pariatah 178 leh RAT hmangin district 11-ah 1,518 a ni a, a vaiin sample 2,709 (mipa 1,491 leh hmeichhia 1,218) niin, chu'ng aṭanga hripui vei hmuh chhuah 178 chu 6.57% a tling.

Zirtawpnia district-a Covid-19 positive hmuh dan chu - Aizawlah 118, Lawngtlaiah 18, Lungleiah 16, Kolasib-ah 12, Champhaiah pasarih, Siahaah panga leh Mamit leh Saitualah pakhat ve ve a ni. IDSP tarlan danin, mi 178-te chu Covid-19 symptom nei 107 leh nei lo 71 an ni. Mi 172 chu Mizorama kái chhâwng an ni a, tun hnaia state páwn aṭanga rawn lut mi paruk an awm. Hri kàina chin hriat loh mi 74 an awm bawk.

ZMC laboratory-a hmuh chhuah mi 26 chu Aizawl leh Lunglei district-a sample lakte niin, symptom nei pathum an awm a, tualchhunga kái vek an ni. An zingah ZMC-a thawk mi pathum an tel a, routine test-a hmuh chhuah an ni.

TrueNAT-PCR hmanga hmuh chhuah mi palite chu Lunglei leh Siaha district-a mite an ni a, tualchhunga kái vek niin, kàina hriat loh pakhat a awm. RAT hmanga hmuh chhuah mi 148-te chu symptom nei 104 leh nei lo 44 an ni a; tualchhunga kái 143 leh tun hnaia state pawn aṭanga lut panga an ni.

Mi 178 zingah naupang kum tling lo 46 aia tlem lo awmin, a tam zawkin symptom an nei a, nausen kum khat tling lo panga an tel. Kum 60 chung lam 10 chuang an awm a, a a zatve velin symptom an nei. June 12, Inrinni khan swab sample ZMC-ah 1,065, TrueNAT hmangin district pakuaah 233 leh RAT hmangin district 10-ah 2,568 hmuh chhuah a ni a, a vaiin sample 3,866 (mipa 2,179 leh hmeichhia 1,687) niin, chu'ng aṭanga hripui vei hmuh chhuah 345 chu 8.94% a tling.

Inrinnia district-a Covid-19 positive hmuh dan chu - Aizawlah 129, Lawngtlaiah 154, Lungleiah 22, Siahaah 20, Champhai leh Kolasib-ah pasarih ve ve, Saitualah pathum, Serchhipah pahnih leh Mamitah pakhat a ni.
IDSP tarlan danin, mi 345-te chu Covid-19 symptom nei 142 leh nei lo 203 an ni a; mi 336 chu Mizorama kái chhâwng niin, mi pakua chu tun hnaia state páwn aṭanga rawn lut an ni. Tualchhunga kái zingah kàina chin hriat loh mi 209 an awm.

Aizawla veng panga leh hmun dang pahnihah hripui vei an tama rin a nih avangin active case search neih a ni a, chuta ṭang chuan Covid-19 positive 195 hmuh chhuah a ni. Dinthar vengah 13, Saron Vengah pakua, Bawngkawnah pariat, Tanhril Ramrikawnah paruk, Kanan Vengah pali, Buichali-ah pariat leh Karlui-I khuaah 147 hmuh chhuah a ni.

Mi 345 zingah naupang kum tling lo eng emaw zat awmin, nausen kum khat tling lo an awm nual a, a naupang ber chu thla hnih mi a ni. A upa ber chu kum 91 mi a ni a, symptom nei a ni. Nimin khan tlai dar 5 thlengin hripui laka fihlim tawh mi 116 chhuahtir an ni a, Inrinni khan mi 187 chhuahtir an ni bawk.

Mizorama Covid-19 vei hmasa ber chu March 24, 2020 khan Guwahati Medical College-ah hmuh chhuah a ni a; ZMC-ah positive 5,507 hmuh chhuah a ni tawh a, TrueNAT-PCR hmangin 1,159 leh RAT hmangin 8,599 hmuh chhuah a ni tawh.

June 12, 2021 thlengin Mizoramah swab sample 4,31,357 endik a ni tawh a, chu'ng aṭanga Covid-19 positive hmuh tawh zat 15,266 chu 3.54% a ni. Hripui vei hmuh tawh zinga mi 11,565 chu Mizoram chhunga kái chhâwng an ni a, mi 3,701 chu Mizoram páwn aṭanga an rawn luh hnua hmuh chhuah an ni thung.