KHAWTHLIR

Thisen pe
KṬP, Model Veng Branch chuan an branch din champha pualin June 12, Inrinni khan an kohhran hall-ah Synod Hospital tan thisen unit 48 an pe a, petute mipa 38 leh hmeichhia 10 an ni.

Ambulance pe
Lengteng bialtu MLA L Thangmawia chuan Covid-19 dona atan a bial chhung Ngopa damdawi-in (CHC) hnenah ambulance a pe. Damdawi-inin lirthei a neih sate pawh MLA fund hmanga thawm ṭhatsak a tum bawk. Thangmawia chuan, a biala nula leh tlangval 12 chu Covid-19 do tura an inpek thu sawiin, "Covid-19 donaa rál hmatáwnga thawk mek te, ramria duty te, task force, kohhran leh pawlte thawhrimnaah lawmthu ka sawi a ni," a ti.

Ráltlânte hlân
MZP leh Chin Baptist Church-a Women department (USA) ṭangkawp chuan June 11, Zirtawpni khan Thekte, Champhai district-ah Myanmar aṭanga Zo hnahthlak ráltlân awmte hnenah chhawmdawlna an hlân. MZP tarlan danin, chhawmdawlna hi Thekte VC kutah a ṭul anga an hman turin Rs. 80,000 leh chawhmeh ṭhahnem tak an hlân a ni. Thekteah hian chhungkua 120 vel awmin, ráltlân mi 138 an awm mek.

MLA-in Covid vei
Aizawl South-III bialtu MLA Dr F Lalnunmawia chu Covid-19 positive a ni tih June 12, Inrinni khan hmuh chhuah a ni. Thu dawn danin, Dr F Lalnunmawia hian Covid-19 symptom a neih avangin Zoram Medical College (ZMC) laboratory-ah a swab sample endik a ni a, hripui a vei tih finfiah niin, ZMC-ah enkawl nghal a ni.

Zero Tolerance
Mizoram sorkar chuan vawiin aṭanga June 20, 2021 thlengin Aizawl Municipal Corporation huam chhungah ngaihhnathiamna tel loa inhremna 'Zero Tolerance Week' a kalpui dawn. Hemi hun chhung hian sorkar SOP leh district magistrate-in chhun lam leh zan lam atana inkaihhruaina a siam zâwm lote chu ngaihdamna tel loin dan anga hrem zel tur a ni. DC-in duty tura a ruatte'n patrolling uluk leh khauh takin an kalpui dawn thu, thupekin a tarlang.