Total lockdown pawhsei leh a ni

Mizoram sorkar chuan Covid-19 vei an tlâkhniam theih loh avangin a ṭum ngana atan total lockdown a pawtsei leh a, June 21 zing dar 4 thleng a awh ang.

June 12, Inrinni khan Mizoram State Disaster Management Authority (SDMA) chuan order a tichhuak a, "Mizoram chhunga Covid-19 dona atan hun rei tak chhung lockdown kalpui a ni tawh a. Heti chung hian hri kai thar tam tak an la awm zel avang leh hri kaiin kiam lam a la pan theih rih loh avangin inkhuahkhirhna hi kalpui chhunzawm zel a ṭul niin a lang," a ti.

Vawiin zing dar 4 aṭanga June 21 thleng total lockdown kalpui turah hian inkaihhruaina, Standard Operating Procedure (SOP) chu June 7-14 chhunga SOP ang deuh tho hman a ni dawn a; dawr hawn theih leh lockdown-in a huam loh zingah telh thar a awm.

Covid-19 léng thawh hnihna a darh hnuah Mizoram sorkar chuan April 20, 2021-ah inkhuahkhirhna a kalpui ṭan a, chumi hnuah lockdown kalpui lehin, May 10 aṭangin total lockdown puan a ni. Total lockdown hi ni sarih chhung atan pawhsei ṭhin a ni a, tun ṭuma pawhsei leh hi a ṭum ngana a ni.

SOP thar ang chuan, AMC huam chhungah total lockdown khauh taka kalpui tur a ni a, district headquarters-ah chuan district thuneitute'n kaihhruaina hranpa an siam ang. Khaw dang zawngah chuan inkhuahkhirhna thlahdul hret a ni thung.