Heroin gram 183 man a ni

Excise & Narcotics department (END) leh ruihhlo dona kawnga an thawhpuite chuan June 12, Inrinni khan heroin gram 183 an man a; ruihhlo kaihhnawiha an mante lakah The Narcotic Drugs & Psychotropic Substances Act, 1985 tlawhchhanin thubuai an ziak lut.

END leh 46th Assam Rifles-te chuan Inrinni tlai dar 3 khan Selesih Vengpuiah heroin gram 123 (hawng 10) leh a neitua puh Ngurdingliani (36) d/o Vanlalchhunga (L), Selesih Vengpuia khawsa nia inchhál an man a; Ngurdingliani hi a hma pawhin ruihhlo vangin man a lo ni tawh.

END leh Sihphir Social reform & Action Committee-te chuan Inrinni vek khan tlai dar 3:40-ah Sihphir Kawnvengah heroin gram 60 (hawng 5) leh a neitua puh mi pahnih - Malsawmzuala (30) s/o Lalrinawma, Kanan Veng, Aizawl leh C Lalbiakzuala (35) s/o C Thangngaia, Sihphir Chhanhim Veng nia insawite an man bawk.

Covid-19 avanga inkhuahkhirhna karah ruihhlo tawlh ru tâwk an la awm zel tih sawiin END chuan, "Ruihhlo man chhuah kawngah leh ruihhlo laka kan ram kan hum theihna tura sorkar thâ tichak turin Mizo mipui ṭawiawmna kan ngen a ni," an ti a; ruihhlo tawlh rûkna leh bawhchhiatna thlen thu hriate chu phone number 0389-2323147 ah hriattir turin an chah a ni.