Mizoramah MIS-C kái an awm tawhah ngai

Mizoramah Multisystemic Inflammatory Syndrome in Children (MIS-C) kái an awm tawha hriat a nih thu sorkar thuchhuahin a tarlang a; India ramah mi 2,000 velin an kái tawh bawk.

Sorkar thuchhuah tarlan danin, June 4, 2021-a Delhi aṭanga haw mipa naupang pakhat, kawṭhalo leh khawsik vanga Synod Hospital-a inentir chu MIS-C ni theia hriat a ni a; tunah erawh chuan ziaawm lam a pan mek.

June 12, Inrinni khan Integrated Disease Surveillance Programme (IDSP) state nodal officer Dr Pachuau Lalmalsawma leh IDSP state epidemiologist Dr R Lalrintluanga te chuan MIS-C ni theia lang natna nei an awm chungchang bawhzuiin Synod Hospital an tlawh a, thil awm dan an enfiah.

Synod Hospital senior consultant Dr John Malsawma, paediatrics sawi danin, Delhi aṭanga haw mipa naupang natna lan chhuah dan chu MIS-C ni theia a lan avangin IDSP chuan June 12 vêk khan Emergency Medical Relief (EMR), New Delhi-a zir chian turin MIS-C report form hmangin report an thawn a ni.

MIS-C hi natna chi khat, Covid-19 vei tawh naupanga awm ṭhin a ni a; lung (heart), chuap, thisen zám, kal (kidney), thluak, vun leh mitte a khawih buai thei. Covid-19 vei, dam tawhteah a lang chhuak thei a, naupangah Corona virus a la awm reng tihna erawh a ni kher lo.

Sorkar thuchhuah chuan, Covid-19 laka invenna - mask vuah ṭhat, kut silfai leh hand sanitiser hman uar bakah, mi dang bula awm lohte a pawimawh thu a tarlang.

Indian Academy of Paediatrics Intensive Care Chapter tarlan danin, MIS-C natna nei hi India ramah 2,000 chuang hmuh chhuah tawh a ni.

MIS-C lan chhuah dan tlangpui

1. Kum 19 hnuai lamah, ni thum aia rei khawsik reh thei lo

2. Pangti bawl

3. Kawṭhalo leh luak

4. Pum na nasa

5. Mit sen

6. Chau ngawih ngawih

7. Thaw hah nasa