Buhfai khulsakna sum hlân

Deputy chief minister Tawnluia chuan a bial, Tuichang huam chhunga AAY leh PHH chhungkua 3,466-te June thla ration buhfai a khulsak dawn a, buhfai khulna tur sum Rs. 2,72,475 chu June 12, Inrinni khan Khawzawl DC Zothanmawia hnenah a hlân.

Tawnluia'n a biala June thla ration buhfai a khulsak zat chu AAY chhungkaw 676 tan quintal 236.6 leh PHH chhungkaw 2,790 tan quintal 671.65 a ni a; buhfai khulna tur sum DC hnena a pek chu khua/veng hrang hranga retailer-te hnenah pek nghal a ni.

FCSCA hotute sawi danin, Covid-19 léng vangin sorkar laipuiin ration quota pangngai bakah AAY leh PHH chhungkaw member pakhat tan kg. 5 zel a thlâwnin a pek belh a, chu chu ration pangngai AAY chhungkaw pakhatah kg. 35 leh PHH chhungkaw member tinah kg. 5 nen a inang lo. Deputy CM-in a khulsak chu sorkar laipuiin a thlâwna a pek belh ni lo, ration pangngai a ni.