Dan bawhchhia report dawng lo

Legal Metrology chuan May 21, 2021 khan inkhàrkhip laia thil man bithliah aia toa hralh sumdawngte hriattirna tur an tichhuak a, nimin thleng khan report an dawng lo.

Legal Metrology hotute chuan, thil man bituk aia toa hralh chungchang report an dawn loh thu Vanglaini an hrilh a, "Inkhàrkhip lai a nih avangin dawr inhawng a tam lo a, chutih rualin, mipui hian heti lam hi kan ngaihsak lem lo emaw, dan bawhchhia an awm lo emaw a ni mai thei," an ti. District hrang hranga dan bawhchhiate report-na tur inspector an ruatte aṭangin report an la dawn loh thu an sawi a ni.

Legal Metrology Controller chuan, May 21, 2021 khan hriattirna tichhuakin, sumdawnna hmuna bungruate chu maximum retail price (MRP) aia sánga hralh emaw, MRP inziak tihdanglam emaw chu phal loh a nih thu a tarlang.

Thil man chungchanga dan bawhchhiate hriattirna tur an tarlang nghal a; Aizawl, Mamit leh Saitual district tan Lalrinthanga phone no. 9436196512, Lunglei district tan Lalrotluanga phone 9436362030, Kolasib district tan Vanlalngheta phone no. 9436151718, Champhai leh Khawzawl district tan V Lalfakzuala phone 7005670443, Siaha district tan R Lalnghakliana phone 9436157372, Serchhip leh Hnahthial district tan Johny Zonunmawia phone 9862122408 leh, Lawngtlai district tan Jeffrey Zothanpuia phone 9077125105-te an ni.