Mo puan 25 aia tam chhawm loh rél

Ṭawitlang Block MHIP Conference vawi 10-na chu nimin khan Hriangtlâng Bûngpui Rúnah ṭan a ni a, Home minister Lalchamliana leh deputy speaker  Lalrinawma ten an hmanpui. Conference thupui chu 'Hmei­chhiate leh naupangte hmasawnna leh himna atan nasa taka ṭan lak' tih a ni. Inkhawmpui chuan, an block huam chhungah mo puan chhawm chu 25 aia tam lo ni se, an ti.

Khuallian Lalchamliana chuan, MHIP-te chu mipa tih theih ang ti ve thei tur leh mipa tluk thei tura ṭan la turin a fuih a, "Mipa chunga roreltu nih erawh tum suh ang che u. Pathian thuin min zirtir angin, 'Hmeichhe lú chu mipa a ni' tih lai hi zawm a pawimawh," a ti a; ruihhlo dona kawnga ke pênpuiah MHIP chu a sáwm nghal.

Mizoram sorkarin hmeichhe dinhmun chawi san a ngaih pawimawh thu sawiin Home Mi­nister chuan, "Aizawl khawpuiah All Women Police Station din a ni tawh a, hmeichhia vekin an enkawl. Aizawlah chauh ni lo, district dangahte pawh la din zel turin ngaihtuahna sèn mek a ni," a ti. Khualzahawm Lalrinawma pawhin thu sawiin, hmeichhiate ngaihhlut záwngin Mizo mipuiah nghawng thui tak a neih avang­in hmeichhiate leh naupangte hmasawnna leh himna atan nasa taka ṭan la ṭheuh turin hmei­chhiate a chah a; HIV/AIDS dona kawng­ah theihtawp chhuah turin a fuih bawk.

Conference hi block president R Lalpekliani'n a kaihruai a, palai mi 130 vel an tel. Rorelnaah, 'Block huam chhungah mo puan chhawm hi 25 aia tam chhawm loh turin branch tinin hmalak ni rawh se,' an ti a; Gutkha pro­duct nasa zawka do an rél bawk. Nimina conference-ah hian tlaiah ruai an ṭheh a ni.