Ráltlân mi 8,000-1,0000 vel an awm : Ṭiau kamah mi ṭhahnem tak an inkulh

Myanmar tualchhung buaina avangin Mizoramah ráltlân mi 8,000-10,000 inkar vel an awm mek. Hetih lai hian, Covid-19 lêng avangin mi eng emaw zat chu khaw chhungah lut loin, Ṭiau lui kamah an inkulh.

Vanglaini palai zawhna chhangin MZP president B Vanlaltána chuan, Myanmar aṭanga Zo hnathlak, Mizorama rawn raltlan zat dik tak an hriat theih bik loh thu a sawi a, "Lut leh chhuak an awm reng a, mi 8000-10,000 vel chu Mizoram hmun hrang hrangah an awm turah kan ngai," a ti. MZP hian tun hnaiah USA-a Chin awmte nen ṭangkawpin hmun hrang hrangah ráltlânte chhawmdawlna an pe a ni.

B Vanlaltana chuan, raltlan zingah chhungte bèl an tam thu sawiin, "Chhungte belh tur nei ve lote pawh an kalna khawtlangin theihtawp chhuahin an lo chhawmdawl ṭhin," a ti a; raltlan ṭhenkhat chuan an theih ang ang thawkin, ei leh in tur an ngaihtuah thu a sawi.

Farkawn YMA hruaitute hnen aṭanga Vanglaini thu dawn danin, Covid-19 léng mek avangin Myanmar ráltlânte chu khaw chhunga luh remtih a ni tawh lo a, an dil angin Ṭiau kama inkulh erawh phalsak an ni.

Farkawn YMA hruaitute chuan, mangan vanga anmahni pantute lo dawnsawn theih loh chu hrehawm an tih thu an sawi a, "Hripui léng mek avangin thil ṭha lo zawk a thlen a hlauhawm si. Tawm hulna ṭha zawk an neih theih nan puihna tur mumal kan nei bik si lo. An khawngaihthlak khawp mai," a ti.

Raltlan zinga damlo, kum upa, nau pâi leh nunaute erawh chu khaw chhunga luh an remtih thu sawiin Farkawn YMA hruaitute chuan, "Hripui léng karah pawh anni ho tawm hulna pawh mumal loa awmtir ngawt chu ni theiin kan hre lo," an ti a; khaw chhunga luh an remtihte chu ni 10 khung hran an nih hnuah hripui an vei leh vei loh endik ṭhin a nih thu an sawi.

YMA Sub-Headquarters, Champhai YMA hruaitute chuan, Myanmar raltlante chu sorkarin official-a an buaipui a remchàn loh avangin an buaipui lo thei lo tih an sawi a, "Kan unau harsatna tâwkte lo ṭanpui hi kan tih turah kan ngai. Chutih rualin, Mizorama rawn raltlante hi an duh dan dana awm tawp loin, ruahmanna siamte zâwm ve ṭhin se a duhawm," a ti.

Ráltlante an khaw lama hruai lêt chu ruihhlo tawlh rûkna remchanga hmang an awm ṭhin thu sawiin Champhai YMA hruaitute chuan, "Hetiang thil thleng hi ṭha kan ti lo hle. Chuvangin, raltlan let turte pawh duh duha lêt tawp loa inhriattir turin kan ti a ni," an ti a; raltlan let duhte chuan YMA kaihhruaina hnuaiah him takin an khua thleng leh se an duh tih an sawi.

Champhai YMA hruaitute chuan, raltlante tan theihtawpa hma an lak zel thu sawiin, "Ṭanpuina kan dawn khawmte a theih ang angin kan sem sawm ṭhin. An kalna khuaa YMA-te pawhin theihtawp chhuahin chhawm­dawl hna an thawk ṭhin a ni," an ti.