Raw-mi supply-tu tur la thlang lo

Horticulture department-in Raw-mi ṭiak (Dendrocalamus Sikkimensis) supply-tu tur zawnna tender chhanna hawng tawh mah se, tender chhangtu an pawm tawhte aṭangin supply-tu tur an la thlang lo.

Rawmi chi supply-tu tur zawnna tender hi mi paliin an chháng a, kumin June 1 leh June 2 khan technical leh financial bid hawn niin, mi pathumte chhànna pawm a ni. Horticulture department aṭanga Vanglaini thu dawn danin, mi pathumte chhanna hi sorkarin a pawmpui leh phawt a ngai a, sorkarin pawmpuina a la ti chhuak lo.

Sorkarin a pawmpui hnuah National Bamboo Mission hnuaia Accreditation Board-in an nursery an endik phawt ang a, chumi hnuah Rawmi ṭiak supply-tu tur thlan a ni ang. Accreditation Board-ah hian chairman chu Horticulture Sec­retary a ni a, member zingah PCCF leh university-a hetiang lam kaih­hnawiha mithiamte an tel.

Tender chhanna pali lut zingah Mizoram Bamboo Producer (Secondary Hardening Unit, Growmore Biotech), IMCS Nursery Firm leh Bairabi Bamboo Producer-te chu pawm an ni a; an pathum hian Rawmi ṭiak pakhat Rs. 85-a supply thei turin an chháng vek a, ṭiak 40,000 supply tur a ni.

Horticulture department chuan, May 19, 2021 khan thuchhuah siamin, thei leh thlai dang angin Rawmi chu hunbi nei a nih thu an tarlang a, "Tun hnaiah Rawmi hi Mizoramah a tám tih hriat a nih avangin Mizoram tualṭo ngei raw ṭha chìn pun a nih a, hman ṭangkai a nih theih nan hmalak a ni," a ti.

Horticulture department tarlan danin, department programme awm sa aṭangin Rawmi chìnna tur chu ram, a zau anga buatsaiha vah fai vek tawh a ni a; kut hnathawktute inruahmanna thlawn lohna turin a hun taka raw ṭiak phuntir chu tihmâkmawhah an ngai a ni.