Lungleiah Truenat khawl pahnih a thleng, Laboratory Block peih hunah RT-PCR khâwl a pek hman tum a ni - Lawmawma

Civil Hospital, Lunglei laboratory-a hman tur swab sample endikna Molbio Truelab Quattro pahnih chu nimin khan Aizawl aṭangin Lungleiah phurh thlen a ni. MLA Lawmawma Tochhawng chuan, Civil Hospital-a Laboratory Block peih a nih hunah MLA Zodintluanga Ralte-in RT-PCR khawl a pek chu hman tum a nih thu a sawi.

Lungleia hman tur Truelab Quattro khawl pahnih leh a kaihhnawih hmanraw dangte chu Lunglei West bialtu MLA C Lalrinsanga leh Lunglei East bialtu MLA Lawmawma Tochhawng ten an MLA fund hmanga an lei a ni.

Lawmawma Tochhawng chuan, hripui léngah sorkarin theihtawp a chhuah zel dawn nia sawiin, MLA Zodintluanga'n RT-PCR khawl a pek chu Laboratory Block peih a nih hunah hman tum a nih thu a sawi a, "Covid-19 léngin zual lam a pan zel avang leh Civil Hospital-a RT-PCR khawl dahna tur Laboratory Block siam tumin hun a la duh deuh dawn avangin tun dinhmuna kan mamawh phuhrukna turin Health department hotute nen inráwn tlangin Truenat lab.-ah khawl dah belh ni se tih kan rawt a ni," a ti.

Lunglei district-a MLA pahnihte fund hmangin Truelab Quattro Real Time Micro PCR analyzer pakhat, Trueprep auto device pahnih, Truelab micro PCR bluetooth printer pakhat, SMPS (AC adapter) pahnih, Truepet 6ul pakhat leh Truelab Real Time Micro PCR workstation accessory pakhat ve ve lei a ni a; a vaiin Rs. 29,12,000 man a ni. Khawlte bakah, Rs. 8,00,000 man hmanraw dangte a tel bawk.

Sorkar thuchhuah tarlan danin, Lunglei Civil Hospital-ah hian Truenat laboratory-ah vawi khata swab sample pali endik thei Truelab Quattro khawl pathum leh vawi khata sample pakhat endik thei Molbio Truelab Uno Dx pakhat a awm a ni.