KHAWTHLIR

Synod-in thlen
Mizoram Synod puipate chuan nimin khan chief minister Zoramthanga a pisaah an kâwm a; Mizoram leh ṭhenawm state ramri buai chinfel thuai a nih theih nana hmalak leh India danpui 8th Schedule-a Mizo ṭawng telh chungchang an sawipui. Chief Minister chuan, Synod thu thlen chu a remchan ang zela bawhzui a nih tur thu a lo hrilh tih sorkar thuchhuahin a tarlang. Synod puipate thu thlen hi Synod Inkhawmpuiin a lo rêl tawh bawhzuina a ni.

Thisen pe
Nimin khan Aizawla Zotlang Branch YMA chuan an hall-ah thisen pek an huaihawt a, Aizawl Civil Hospital (ACH) tan thisen unit 72 pein, petute mipa 63 leh hmeichhia pakua an ni. ACH Blood Bank-ah a thlàwna thisen pek unit 13 leh replacement unit 50 a awm bawk. Nimin vêk khan ṬKP, Serchhip Unit-te'n District Hospital-ah thisen unit 32 an pe a, petute mipa 20 leh hmeichhia 12 an ni. 8th Assam Rifles mi pariatin thisen an pe bawk.

Containment zone
Aizawla Covid-19 vei tam zualna veng, containment area-a puan tawh zingah Zarkawt venga Vanapa section hmun ṭhenkhat chu Aizawl bawrhsap Dr Lalhriatzuali Ralte-in containment area-ah a puan belh. Hetih lai hian, Central Jail Veng - Tuivamit leh Bawngkawn vengte chu dinhmun hlauhthawnawma an awm tawh loh avangin containment area a nihna a hlip thung.

CCTV hlân
AMC Ward-XVII councillor David Zohmangaiha chuan nimin khan Venghlui khawtlang tan closed circuit television (CCTV) a pe a, Venghlui LTF pisaah a hlân. CCTV hi AMC Ward Development Purchase Fund hmanga lei a ni a, camera pali bun niin, Venghluia containment area-ahte dah a ni.

Tanpuina hlan
Aizawl North-II bialtu MLA Dr Vanlalthlana chuan nimin khan a bial chhunga veng pakuaa local task force-te a tlawh kual a, hripui laka invenna hmanraw hrang hrang leh chhungkaw harsa zualte puihna tur sum a pek bakah, a biala pawl 10 pass tharte pualin lehkhabu eng emaw zat YMA-te hnenah a hlân. MLA hi AMC Ward-III councillor C Lalchhandami'n a ṭawiawm a ni.