Vawiin YMA Day vawi 87-na

Vawiin, June 15 hi Young Mizo Association (YMA) din champha vawi 86-na a ni a, Covid-19 hripui léng vangin lawm a ni dawn lo. Central YMA president Vanlalruata chuan, YMA hruaitute chu ṭanpui ngaite ṭanpui turin a chah.

CYMA President hian nimin khan YMA Day pualin thuchah a tichhuak a, "Pathianin a missionary kaltlanga Zo fate a pekah chuan ropui ber pawla kan chhâl ṭhin chu YMA hi a ni. YMA thupui 'Ṭanpui ngaite ṭanpui' a nih angin, mi dangte ṭanpui kawnga theihtawp chhuaha pên chhuak turin YMA hruaitute ka sáwm a ni," a ti.

Vanlalruata chuan, hruaitu hmasate inpekna leh taimakna azarah YMA a ropui tawh hle tih sawiin, "Mi dang tana luan chhuahna kan lo tih tawh ṭhin te, riangvai chanhaite hnemtu kan nihnate i hre thar leh ang u," a ti a; YMA member zawng zawngte YMA Day chibai a bûk.

Tun dinhmunah YMA member 4,46,623, branch 881, group 48 leh sub-headquarter pariat a awm mek a ni.