Mizoramah Covid-19 vangin mi 69 an thi tawh

Covid-19 vangin Mizoramah Pathianni zan khan mi pahnih an thi a, a hmain khaw ên laiin mi pahnih an thi tawh. Nimin khan mi panga an thi leh bawk. Sorkar record angin hripui vei Mizorama thi tawh chu mi 69 an ni.

State Referral Hos­pital (ZMC)-a Covid-19 vei enkawl lai Thanṭhuama (65) w/o Lalnghakliani, Ram­hlun South chu June 13, Pathianni zan dar 6:20 khan a thi a, nimin chawhma dar 11 khan BCM Kohhran Hall-ah vui a ni. Amah hi natna benvawn dang nei sa a ni a, Covid-19 positive a ni tih May 26, 2021-ah hmuh chhuah niin, May 28-ah damdawi-inah dah luh a nih thu sorkar thuchhuakin a tarlang.

Pathianni zan vek zanlai dar 12:10 (June 14) khan Rochhingvungi (91) m/o Lallungmuana, Electric Veng chu SRH-ZMC-ah a thi a, nimin chawhnu dar 3-ah vui a ni. Electric Veng LTF hruaitute hnen aṭanga thu dawn danin, Rochhingvungi hi a damlo a, Covid-19 symptom a neih avangin June 11 khan swab test tih niin, hripui a vei tih hmuh a ni. SRH-ah lâk nghal a ni a, June 13 zing aṭangin ventilator nen enkawl a ni.

Nimin zing dar 4:10 khan H Hrangkima (84) h/o PC Lalrinthangi, Chhinga Veng chu Covid-19 vangin an inah a thi a, nimin chawhma dar 11 khan an inah vui a ni. Amah hi Covid-19 positive a ni tih June 9, 2021-ah hmuh chhuah a ni a, an inah enkawl niin, damdawi-inah dah a ni lo. Natna benvawn dang nei sa a nih thu sorkar thuchhuakin a tarlang.

Nimin vek chawhma dar 10:45 khan hripui vei enkawl lai Elizabeth Lalrinpuii (32) w/o John Sangkhuma, Dawrpui Vengthar chu SRH-ZMC-ah a thi a, nimin vek khan vui a ni. Amah hi Covid-19 positive a ni tih June 9, 2021 khan hmuh chhuah a ni a, June 12-ah SRH-ah dah luh a ni.

Nimin tlai dar 3:30 khan Covid-19 vei enkawl lai Rohlupuii (62) w/o R Lalremsanga, Khawzawl Hermon Veng pawh a thi a, vawiinah vui a ni ang.

Khawzawl aṭanga thu dawn danin, Rohlupuii hi chaw kawng cancer niin, Aizawla inenkawl lai a ni a, chemo khai a ngaih avangin Mizoram State Cancer Institute-ah enkawl a ni. A swab sample endikna hmasaah a negative a, mahse, Covid-19 symptom a neih nasat avangin June 13, Pathianni khan a sample endik leh niin, hripui a vei tih hmuh chhuah a ni a, SRH-ZMC-ah sawn nghal a ni.

Nimin tlai dar 5:15 khan H Lalthlamuani (59) w/o Lalthlamuana, Tuithiang, Aizawl chu Covid-19 vangin SRH-ZMC-ah a thi bawk a, naktukah vui a ni ang. H Lalthlamuani hi hripui vei a ni tih May 17, 2021-ah hmuh chhuah niin, May 20-ah SRH-ZMC-ah dah luh a ni a; natna benvawn dang nei sa a nih thu sorkar thuchhuakin a tarlang.

Sorkar record angin, nimin tlai dar 6 thleng khan Mizoramah Covid-19 vangin mi 69 an thi tawh. June thla bikah mi 19 an thi tawh a; nikum khan mi pariat, kumin January, February leh March-ah mi pakhat ṭheuh, April-ah mi pali leh May-ah mi 25 an thi a ni.